Գավառի տարածաշրջանի գյուղերում այս տարի աղվեսները նկատելիորեն շատացել են: Աղվեսները ոչ միայն հաճախ են հայտնվում գյուղամիջում, այլեւ` մշտական բնակություն են հաստատել համայնքներում:
Սարուխան, Լանջաղբյուր եւ Նորատուս գյուղերի եզրային հատվածներում աղվեսների այցելություններն անսովոր չէին, բայց այս տարի աղվեսները ոչ միայն շատացել են, այլեւ հաստատվել են տների բակերում ու տանիքներում:
Սարուխանի բնակչուհի Օֆելյա Գսպոյանը «Առավոտի» հետ զրույցում նշեց, որ աղվեսների ներկայությունն արդեն սովորական է դարձել բակերի շների համար, նույնիսկ շները չեն հաչում: Աղվեսներն անարգել իջնում են բակեր, խմում շների կերակրամանի ջուրը, ուտում հարեւաններից գողացած հավերն ու ճագարները:
Բնակիչները նշում են, որ նրանց որսալը շատ բարդ է, որովհետեւ աղվեսները շատ զգուշ են: Աղվեսները նշված գյուղերում ապրում են հիմնականում արտագնա աշխատանքի մեկնած բնակիչների դատարկ տների տանիքներում, որտեղ բազմանում ու ձագեր են հանում:
Կարդացեք նաև
Աղվեսները մշտական բնակության են անցել Գավառ քաղաքի կենտրոնական թաղամասերում: Բնակիչներից մեկը նշում է, որ աղվեսներն իրենց բակ են գալիս երեկոյան ժամը 8-ից հետո: Բերում են հիմնականում ճերմակ հավեր, ճագարներ կամ անասունների փորոտիք ու փշեր:
Կենտրոնական թաղամասում տեսել են երեք աղվեսների, որոնցից մեկը մոխրագույն է: Գիշերելով բակերում` աղվեսները վայելում են ավարը, քանդում ցանված կարտոֆիլները:
Բնակիչները ահազանգում են, որ սեփական ուժերով աղվեսներին քշելն անհնար է:
Գավառի փոխքաղաքապետ Գրիգոր Բոշյանը, պատասխանելով «Առավոտի» հարցին, ասաց, որ աղվեսների գոյության հարցով ոչ մի բնակիչ չի դիմել քաղաքապետարան, դիմումների դեպքում քաղաքապետարանը կձեռնարկի համապատասխան միջոցառումներ:
Լուսանկարներում աղվեսների թողած հետքերն են: Չնայած «Առավոտի» թղթակցի երկար դարանակալումներին` աղվեսներին տեսախցիկով որսալ չստացվեց:
Անի ՊՈՂՈՍՅԱՆ
