Ինչպես Aravot.am-ին տեղեկացնում են Շիրակի մարզի դատախազությունից , նախորդ օրը ձերբակալվել է Շիրակի մարզպետարանի քաղաքաշինության վարչության նախկին պետ , ԲՀԿ-ական Արտաշես Սարգսյանի որդին` Ռուստամը, որը պարզվում է, նույնպես մասնակցություն է ունեցել խոհարարի պատճառով ծագած վիճաբանությանը:
Հիշեցնենք, որ մոտ 10 օր առաջ «ինչու՞ իմ խոհարարին խլեցիր» թեմայով թունդ ռազբորկա էր սկսվել երկու շաուրմանոցների տերերի` Շիրակի մարզի քննչական բաժնի արդեն նախկին պետ Կարուշ Թովմասյանի փեսայի` 32-ամյա Գառնիկ Գիրգորյանի և Շիրակի մարզպետարանի քաղաքաշինության վարչության նախկին պետ Արտաշես Սարգսյանի փեսայի միջև, որին, ըստ էության, խառնվել են նաև այս երկու գերդաստանների տղաները: Արդյունքում հնչել էին կրակոցներ, քրեական գործ էր հարուցվել խուլիգանության եւ ապօրինի կերպով զենք պահելու դեպքերի առթիվ, հետաքննությամբ պարզվել էր, որ դեպքը տեղի է ունեցել Գյումրի-Սպիտակ ավտոճանապարհին, և վիճաբանությանը մասնակցել էին նաև Գառնիկ Գրիգորյանի հորեղբոր որդին ու Անդրանիկ Կարապետյանի աներորդին` Ռուստամը:
Շիրակի մարզի դատախազությունից մեզ հայտնեցին, որ Ռուստամ Սարգսյանի դեմ հարուցվել է քրեական գործ քրեական օրենսգրքի 34, 104 և 235 հոդվածներով` սպանության փորձ կատարելու ու ապօրինի զենք-զինամթերք կրելու առիթով: Ի դեպ, Ռուստամ Սարգսյանի անունը հայտնի է մեկ այլ սկանդալով ևս, 5 տարի առաջ նա Գյումրու կենտրոնում մենամարտի մեջ էր մտել քաղաքապետ Վարդան Ղուկասյանի որդու` Սպարտակի հետ, կրակոցներ էին հնչել, որի պատճառով էլ երկուսն էլ ձերբակալվել էին:
Նունե ԱՐԵՎՇԱՏՅԱՆ
Կարդացեք նաև
