«Պարոն Սարգսյան, Հանրային խորհուրդը պաշտոնական հաղորդագրություն է տարածել, որով ըստ էության, Ձեզ մեղադրում է նախորդ տարիներին հսկայական գումարներ աշխատելու մեջ: Հետաքրքիր է, ի՞նչ գումարներ եք աշխատել», Aravot.am-ի հարցին ի պատասխան՝ Երեւան քաղաքի գլխավոր ճարտարապետ Նարեկ Սարգսյանն ասաց. «Միշտ հարգանքով եմ վերաբերվել Վազգեն Մանուկյանին և բարձր եմ գնահատում նրա անցած ճանապարհը:
Անկեղծ ասած, նրա տրամաչափի պետական գործչից այդ մակարդակի պատասխան չէի ակնկալում: Հանրային խորհրդի անունից տարածված զրպարտչական բնույթի խոսքը ուղղակիորեն հաստատում է իմ համոզմունքը, թե ով է տեքստի հեղինակը և ով է ուղղորդում Հանրային խորհրդի քաղաքաշինության ոլորտին վերաբերող հարցերը:
Ինչ վերաբերում է այդքան երազած «հսկայական գումարներ աշխատելուն», ապա ի տարբերություն Վազգեն Մանուկյանի որոշ մերձավորների, ես երբևէ որևէ բիզնեսի մեջ չեմ եղել, չկամ և իմ ապրուստը վաստակել եմ բացառապես իմ մասնագիտությամբ, այն է՝ ճարտարապետական նախագծումով, ինչը կարող են հաստատել բոլոր գործընկերներս, այդ թվում նաև՝ Հանրային խորհրդի շատ անդամներ»:
Հիշեցնենք, որ ՀՀ Հանրային խորհրդի մամուլի ծառայության տարածած հաղորդագրության համաձայն՝ Հանրային խորհրդի նախագահ Վազգեն Մանուկյանը մասնավորապես ասել էր. «Վերջին շրջանում հանրության և հատկապես երիտասարդության կողմից կարևորվում են բնապահպանական և քաղաքաշինական խնդիրները, և պատահական չէ, որ բազմաթիվ հարցերի հետ միասին ՀԽ նախագահն ակտիվորեն մասնակցեց Հանրային խորհրդում կազմակերպված հանրային քննարկումներին՝ կապված Մաշտոցի պուրակի և Ծածկած շուկայի խնդիրների հետ:
Կարդացեք նաև
Զարմանալի է, որ Երևանի գլխավոր ճարտարապետը, որ կարծես թե ինքը պետք է մտահոգված լիներ հանրության առջև ծառացած քաղաքաշինական խնդիրներով, անձնավորում և պիտակավորում է Հանրային խորհրդի ակտիվությունն այդ ոլորտում` բավականին հիստերիկ ձևով և բարեկամական կապերի ծիծաղելի ու անտեղի փաստարկներով: Ինչպես երևում է, Հանրային խորհուրդը խանգարում է գլխավոր ճարտարապետին, սակայն ո՞ր հարցում…
Վաղուց անցել են այն ժամանակները, երբ լինելով քաղաքի գլխավոր ճարտարապետ, կարելի էր Երևանն ուզածի պես և անպատիժ մնալով քանդել կամ ձևափոխել՝ պատճառաբանելով, թե դա նախագահի կան վարչապետի հրամանն է, արանքում էլ հսկայական գումարներ աշխատել:
Ժամանակն է համակերպվել այն մտքի հետ, որ հասարակությունն ուշադիր հետևում է այն բոլոր հարցերին, որոնք կապված են քաղաքաշինության և Երևանի ապագայի հետ:
Հանրային խորհուրդը շարունակելու է հետևողականորեն բարձրաձայնել հանրությանը հուզող խնդիրները` այդ թվում նաև քաղաքաշինական, և հետամուտ է լինելու դրանց լուծմանը` հավատարիմ մնալով իր գործունեության գլխավոր նպատակին, այն է` քաղաքացիական հասարակության կայացումը Հայաստանում»:
