Ամասիայի տարածաշրջանի փոքրաթիվ բնակչություն ունեցող (301 բնակիչ, որից 220 ընտրող են) հեռավոր գյուղերից մեկում` Ջրաձորում, հետաքրքիր ընտրապայքար է սպասվում: Որքան էլ տարօրինակ թվա, այստեղ միմյանց դեմ են պայքարելու գործող գյուղապետ, 52-ամյա Գևորիկ Հովակյանն ու նրա կինը` Կարինե Վարդանյանը: Ընտանեկան առաջադրման փաստը մեզ հետ զրույցում հաստատեց նաև թիվ 33 ընտրատարածքային ընտրական հանձնաժողովի նախագահ Գրիգոր Հովհաննիսյանը: Փաստորեն կնոջն ամուսնու դեմ հանել է ՀՀ Ընտրական օրենսգիրքը, որտեղ կատարված վերջին փոփոխության համաձայն, մեկ թեկնածուի առաջադրման դեպքում գրանցումը բացառվում է:Այսինքն՝ օրենսդիրները շահագրգռված են, որ իրոք ընտրապայքար լինի, թեկնածուները լինեն մեկից ավելի, առանց մրցակցության ընտրություն չկատարվի, մինչդեռ հնարամիտ գյուղապետերը գտել են նաև այս օրենքը շրջանցելու ձևը.նրանք շատ դեպքերում մրցակցի փոխարեն մուծելով պահանջվող գրավաչափը, ձևականորեն իրենց դեմ են հանում գյուղապետարանի աշխատակիցներին, հարազատ-բարեկամներին, իսկ այս դեպքում՝ նույնիսկ կողակցին:
Նունե ԱՐԵՎՇԱՏՅԱՆ
