ՀՀԿ փոխնախագահ Էդուարդ Շարմազանովի կարծիքով, Կապանի գործող քաղաքապետը ինքնաբացարկի է դիմել, երբ հասկացել է, որ ՀՀԿ թեկնածուի հաղթելու շանսերն ավելի մեծ են: «Բոլոր ազդեցիկ ուժերը Կապանում պաշտպանում են Հանրապետական թեկնածուին, գնացեք Կապան ու հարցրեք` ո՞ւմ շանսերն են բարձր: Նույն այդ քաղաքապետին ժամանակին սատարել են նաեւ մեր՝ Հանրապետական ընկերները, այսօր Հանրապետական կուսակցության բոլոր տեղի կառույցները սատարում են ՀՀԿ թեկնածուին, եւ տրամաբանական եմ համարում, որ մարդը ծանր ու թեթեւ է արել իր շանսերը ու հասկացել, որ ընտրվող քաղաքապետը կլինի Հանրապետական թեկնածուն»,- այսօր ՀՀԿ գործադիր մարմնի նիստից հետո լրագրողներին ասաց պարոն Շարմազանովը:
Նա ասաց, որ Կապանի քաղաքապետին ՀՀԿ-ի կողմից ճնշումների մասին խոսակցությունները բամբասանքներ են. «Եթե որեւէ քաղաքացի վախենում է իր բարեկամներից, ընկերներից, իր ճակատագրի համար կամ ճնշումներ են գործադրվում, այդ հարցը պետք է ուղղել այն մարդուն, որը նման հայտարարությամբ է հանդես եկել, այլ ոչ թե կուսակցությանը»:
ՀՀԿ գործադիր մարմնի նիստում, պարոն Շարմազանովի խոսքերով, քննարկվել են ներկուսակցական կազմակերպչական հարցեր, ՏԻՄ առաջադրման խնդիրներ: Նիստը վարել է կուսակցության նախագահ Սերժ Սարգսյանը: Ըստ պարոն Շարմազանովի, ՀՀԿ-ն կարեւորում է ՏԻՄ ընտրությունները. «Դրանք պետք է անցնեն բարձր մակարդակով, որովհետեւ Հանրապետական կուսակցությունը որդեգրել է Հայաստանի համակարգային ժողովրդավարացման բարեփոխումների փուլը: Ընտրությունները չպետք է զիջեն իրենց որակով խորհրդարանական ընտրություններին»:
Արփինե ՍԻՄՈՆՅԱՆ
Կարդացեք նաև
