ՀԱԿ խմբակցության ղեկավար Լեւոն Զուրաբյանը Ազգային ժողովում նախօրեին խոսել է ազատազրկման դատապարտված ՀԱԿ ակտիվիստների մասին ու իշխանություններին զգուշացրել ` եթե դատարանի վճիռները մնան ուժի մեջ, Հայաստանը կունենա 4 քաղբանտարկյալ, ինչը կսրի ներքին քաղաքական վիճակը: Ազատազրկման դատապարտված ՀԱԿ ակտիվիստներին ազատ արձակելու պահանջով այսօր գլխավոր դատախազության առաջ ՀԱԿ-ի հերթական ակցիայի ժամանակ պարոն Զուրաբյանը հավաքվածներին ասաց. «Եթե դատարանի վճիռները մնան ուժի մեջ, դա անպայման կբերի նրան, որ Հայաստանի վրա էլի կլինեն ճնշումներ, Հայաստանի միջազգային վարկը նորից կվնասվի: Հակառակ նրան, որ օրենքի պահանջի համաձայն այդ հայտարարություններն ամբողջությամբ պետք է հեռարձակվեն հեռուստատեսությամբ, մեր բոլոր սուր ելույթները, որոնք վերաբերում են քաղբանտարկյալներին , մարտի 1-ին , թալանին եւ այլն, բոլոր ելույթները մոնտաժվել են ու հանվել, ցույց չեն տալիս` կոպտորեն խախտելով Հայաստանի օրենքը: Ինչը նշանակում է, որ իշխանություններն անգամ 7 պատգամավորի քննադատությունից վախենում են »:
Պարոն Զուրաբյանը նաեւ ասաց, որ այսօր ՀԱԿ կենտրոնական գրասենյակում հանդիպել է բանակում մահացած զինվորների ծնողներին: Նրանք պարոն Զուրաբյանին պատմել են որդիների մահվան հանգամանքները. «Հնարավո՞ր է սիրել մի պետություն, որը կատարում է նման հանցագործություններ ,իսկ հետո պետական մակարդակով այդ հանցագործությունները պարտակում է: Հնարավո՞ր է սիրել մի պետություն, որը մարտի 1-ի նման հանցագործություն է կատարում ` կրակելով սեփական քաղաքացիների վրա, զրկում նրանց կյանքից ու հետո նորից պարտակում այդ հանցագործությունը: Հնարավո՞ր է սիրել մի պետություն, որը պետականորեն կեղծում է ընտրությունները ու մեր գլխին փաթաթում թալանչի մի կառավարություն, որը մենք չենք ընտրել: Հնարավո՞ր է սիրել մի պետություն, որի պաշտպանության նախարարության բժշկին օլիգարխի թիկնապահները կարող են սպանել, իսկ հետո այդ պետության ամենամեծ զբաղմունքը լինի այդ օլիգարխին ազատեն պատասխանատվությունից: Հնարավո՞ր է սիրել մի պետություն, որը ոչ թե փառաբանում է իր երիտասարդներին, որոնք պայքարում են ազատության համար, այլ հակառակը՝ նրանց ուզում է ոչնչացնել ու փտեցնել բանտերում»: Մանրամասները՝ տեսանյութում:
Արփինե ՍԻՄՈՆՅԱՆ
Կարդացեք նաև
