Խնձորով այս թխվածքի բաղադրատոմսը ինձ տրամադրել են Շվեդիայում: Այնտեղ բնակվող մի հայուհի տանտիկին մեզ հյուրասիրեց այս չափազանց համեղ թխվածքից եւ ասաց, որ սա շվեդուհիների սիրած բաղադրատոմսերից է: Եվ արդեն վեց տարի` այս թխվածքը դարձել է նաեւ իմ ընտանիքի եւ հյուրերի նախընտրածներից մեկը:
Եվ այսպես, մեզ անհրաժեշտ է.
5 մեծ խնձոր
3 ձու
Կարդացեք նաև
200 գրամ շաքարավազ
3 ճաշի գդալ յուղ կամ կրակի վրա հալեցրած 150գրամ կարագ
2 բաժակ ալյուր
3/4 բաժակ կաթ
1 գդալ սոդա
1-ական պտղուց դարչին եւ վանիլ:
Պատրաստման եղանակը
Խնձորը կեղեւահանել, կտրատել խոշոր կամայական կտորներով: Վրան դարչին ցանել եւ մեկ-երկու գդալ շաքարավազ, թողնել մի կողմ:
Խմորի համար միքսերով հարել ձուն, մնացած շաքարավազը, յուղը: Երբ ճերմակ եւ հարթ զանգված դառնա, ավելացնել սոդան, վանիլը եւ ալյուրը, շարունակել խառնել: Երբ կդառնա պինդ խմոր, քիչ-քիչ ավելացնել կաթը եւ շարունակել խառնել: Արդյունքում պետք է դառնա բավականին թույլ, բիսկվիթային խմորի նման զանգված:
Խմորի 3/4 մասը լցնել ջեռոցի թավայի մեջ, վրան լցնել խնձորը, ապա մնացած խմորով ծածկել:
Այս ամենի վրա տարածել նշի թերթիկներ: Քանի որ Երեւանում գրեթե անհնար է գտնել նշի թերթիկներ, իսկ դրանք տանը պատրաստելը բավականին աշխատատար է (հարկավոր է եռման ջրի մեջ թողնել նուշը մինչեւ փափկի, ապա կեղեւահանել, որից հետո հնարավոր կլինի մանր կտրատել նուշը` երկայնքով), ապա կարելի է նշի թերթիկների պահը կամ բաց թողնել, կամ փոխարինել, ասենք, կոտրած ընույզով:
Դնել 160 աստիճան ջերմաստիճանով տաքացրած ջեռոցը` գրեթե մեկ ժամ: Ընթացքում հետեւել խմորին, գուցե կարիք լինի ավելի վաղ հանել: Հարկավոր է սուր փայտիկով ստուգել խմորի պատրաստվածության աստիճանը, եթե փայտիկը չոր դուրս գա խմորի միջից, ուրեմն` թխվածքը պատրաստ է:
Այս թխվածքը շատ համեղ է ինչպես փոքր ինչ տաք վիճակում` մի գդալ պաղպաղակի հետ, այնպես էլ` սառած վիճակով:
Բարի ախորժակ:
Պատրաստեցի և շատ հավանեցի,ուղղակի հրաշք թխվածք է: Շատ շնորհակալություն բաղադրատոմսի համար
Անուշ լինի: Շնորհակալ եմ արձագանքի համար: 🙂
Շնորհակալություն,շատ համեղ է: Պատրաստել եմ ընկույզով: Եթե կարող եք օգնեք:Որտեղից Երևանում կարող եմ գնել նշի թերթիկներ?
Ամբողջական հոդվածը կարող եք կարդալ այս հասցեով՝ https://www.aravot.am/2012/10/13/308846/
© 1998 – 2015 Առավոտ – Լուրեր Հայաստանից
Անուշ լինի, հարգելի Սուսաննա: Ես էլ եմ շնորհակալ արձագանքի համար: Ցավոք, վաղուց Երեւանի խանութներում չեմ գտնում նշի թերթիկներ, այդ իսկ պատճառով արտասահմանից եմ բերում կամ ընկերներիս եմ խնդրում բերեն: