Հոկտեմբերի 23-ին Տավուշի մարզի առաջին ատյանի դատարանի Բերդի նստավայրում սկսվել է 2012թ. հունվարի 18-ին Բերդ քաղաքի բնակիչ Վլադիմիր Վանեսյանի ննջասենյակի պահարանից 38 միլիոն 488 հազար դրամ արժեքով կանխիկ գումարի եւ ոսկեղենի գողության մեջ մեղադրվող Կորյուն Ալավերդյանի եւ Մայիս Խաչատրյանի դատավարությունը:
Երկուսն էլ նախկինում դատված են: 1970թ. ծնված Կորյուն Ալավերդյանը հաշվառված է ՌԴ Դոնի Ռոստով քաղաքում, սական բնակվել է Բերդում, Մասիս Խաչատրյանը հաշվառված է եւ բնակվել է Վանաձորում: Կ. Ալավերդյանին մեղադրանք է առաջադրված ՀՀ քրեական օրենսգրքի 38-177 հոդվածի 3-րդ մասին 1-ին եւ 1.1. կետերով, իսկ Մ.Խաչատրյանին՝ 177 հոդվածի 3-րդ մասին 1-ին եւ 1.1. կետերով: Այս գործով երրորդ մեղադրյալ, վանաձորցի Վահե Թումասյանը հայտնաբերված չէ, նրա նկատմամբ հայտարարված է հետախուզում: Ավելի քան 38 միլիոն դրամ արժողությամբ գողոնից ոստիկանները հայտնաբերել են միայն մեկ ոսկե մատանի: Ամբաստանյալները դատարանում հայտարարել են, որ առաջադրված մեղադրանքում իրենց մեղավոր չեն համարում: Դատարանում նրանց շահերը ներկայացնում են ՀՀ փաստաբանների պալատի անդամներ Մհեր Դավթյանը եւ Ռուբեն Հակոբյանը : Այս գործով դատական հաջորդ նիստը կկայանա նոյեմբերի 8-ին:
Ոսկան ՍԱՐԳՍՅԱՆ
