Ինչպես արդեն հաղորդել ենք՝ այսօր Վերաքննիչ քրեական դատարանը որոշեց ուժի մեջ թողնել Կենտրոն եւ Նորք- Մարաշ վարչական շրջանների ընդհանուր իրավասության դատարանի որոշումը, որով ՀԱԿ 4 ակտիվիստներ դատապարտվել էին 2-6 տարվա ազատազրկման:
Դատավճռի հրապարակմանը ամբաստանյալներից ոչ ոք ներկա չէր, նրանք բոյկոտել էին: Նրանց պաշտպան Ստեփան Ոսկանյանը տեղյակ չէր, անազատության մեջ գտնվող Տիգրան Առաքելյանին Նուբարաշենի քրեակատարողական հիմնարկից չէի՞ն բերել, թե՞ նա էլ էր բոյկոտել:
Վճռի հենց հրապարակումից հետո դահլիճում ներկա ՀԱԿ ակտիվիստները սկսեցին գոռալ «ամոթ, գետինը մտնեք» ու սկսեցին ոտքերով խփել գետնին: «Պեպոյի դատավարությունն է, չենք զարմանում»,- գոռաց ակտիվիստներից մեկը: Մեկ ուրիշն էլ հավելեց.«Թալանչիների դատարանն է, որտեղ պաշտպանում են միայն Հայաստանը թալանողներին: Հազար անգամ ամոթ ձեզ, գետինը մտնեք»:
Դատարանի ներսում բողոքողներին միացան դրսում հավաքված ակտիվիստները եւ բողոքի ակցիան շարունակվեց դրսում: Ակտիվիստներն ու ՀԱԿ համախոհները միջնամատերը դատարանին պարզած՝ «Սերժիկի տղաներ, ծախու դատավոր» էին գոռում:
Կարդացեք նաև
Պաշտպան Ստեփան Ոսկանյանն ասաց, որ բողոքարկելու են վճիռը Եվրոպական դատարանում. «Պատվիրված դատավարություն էր: Այս ամբողջ գործի հանգամանքների սխալը գալիս է նախաքննության ժամանակ կեղծ վկայություններից, վարկածներից: Այս ամեն ինչը շեղվել է հենց նախաքննության սկզբից»:
Արփինե ՍԻՄՈՆՅԱՆ
