Ազգային ժողովի հայտարարությունների ժամին ՀԱԿ խմբակցության պատգամավոր Նիկոլ Փաշինյանն անդրադարձավ ՀՀ վերաքննիչ դատարանի այսօր կայացրած վճռին, որով անփոփոխ է թողնվել ՀԱԿ երիտասարդ ակտիվիստների նկատմամբ առաջին ատյանի դատարանի կայացրած վճիռը։ Արձանագրելով, որ ՀՀ վերաքննիչ դատարանը գործել է Քրեական օրենսգրքի մի շարք խախտումներով, Նիկոլ Փաշինյանը եզրակացրեց, որ դա արվել է՝ քողարկելու համար առաջին ատյանի դատարանի անօրինական վճիռը։ «ՀՀ-ն այս վիճակում է, քանի որ 2008 թվականից սկսած՝ ապօրինի դատական համակարգը ամեն ինչ անում է իշխանությանը սատարելու համար»,- ասաց պատգամավորը՝ նկատելով, որ դատական համակարգի ֆունկցիան պետք է լիներ «Մարտի 1»-ի մեղավորներին հայտնաբերելը եւ պատժելը, մինչդեռ դրանք նպաստում են, որպեսզի Հայաստանը քաղբանտարկյալներ ունենա։
Այս ամենի համատեքստում պատգամավորը նկատեց. «Դա նշանակում է, որ իշխանավորները 2008-ից դասեր չեն քաղել, ինչպես հայտարարում են տարբեր առիթներով»:
Նելլի ԳՐԻԳՈՐՅԱՆ
