«Հանրությունը մասմամբ պատկերացում ունի այն խնդիրների մասին, որոնք այսօր ծառացած են հաշմանդամություն ունեցող անձանց առջեւ» ,-այդ մասին այսօր լրագրողների եւ ՀԿ-ների հետ հանդիպման ժամանակ ասաց «Սեյվ դը չիլդրեն» կազմակերպության կողմից իրականացվող «Հաշմանդամություն ունեցող անձանց կենսամակարդակի բարելավում զբաղվածության խթանման միջոցով» (LIFE) ծրագրի տնօրեն Ջինա Սարգիզովան:
«Լիարժեք կյանք» ՀԿ-ի հետ համատեղ աշխատանքի արդյունքում կազմակերպված կլոր սեղան- քննարկման ընթացքում «Մենք բոլորս իրավունք ունենք աշխատելու» քարոզարշավի շրջանակներում ներկայացնելով «Հաշմանդամություն ունեցող անձանց զբաղվածության վերաբերյալ հանրային կարծիքի վերլուծության» արդյունքները` Ջինա Սարգիզովան նշեց, որ պարզվում է` հանրությունը հստակ պատկերացում չունի, թե ում կարելի է համարել կամ ով է հաշմանդամություն ունեցող անձը:
«Ցավոք սրտի հաշմանդամություն ունեցողների շարքին են դասվում այն անձինք, ովքեր ունեն այսպես կոչված տեսանելի հաշմանդամություն: Չնայած բազմաթիվ միջազգային կազմակերպությունների եւ պետական կառույցների, հկ-ների կողմից տարիներ շարունակ բարձրացվում է հաշմանդամություն ունեցող անձանց խնդիրները, այնուամենայնիվ, հասարակության վերաբերմունքը դեռւես մինշանակ չէ, եւ այս ինչ-որ չափով բացասական վերաբերմունքն ընդամենը չիմացության, տարածված կարծրատիպերի արդյունք են» :
Պատասխանելով Aravot.am –ի հարցերին` Ջինա Սարգիզովան նշեց, որ հաշմանդամություն ունեցող անձանց խնդիրները բոլոր մարզերում համարյա թե նույնն են:
Կարդացեք նաև
Խոսելով հաշմանդամություն ունեցող անձանց զբաղվածության խնդրի մասին` Ջինա Սարգիզովան կարծիք արտահայտեց, որ գործատուներն ու ընդհանուր առմամբ հանրությունը որոշ կարծրատիպեր ունեն հաշմանդամություն ունեցող անձանց զբաղվածության վերաբերյալ:
«Մենք ունենք մի մեծ բանակ հաշմանդամություն ունեցող անձանց, որոնք ունեն ներուժ, համապատասխան պատրաստվածություն, համապատասխան մասնագիտություն, բայց, ինչպես եւ բոլորը, չեն կարողանում գտնել աշխատանք: Եւ աշխատանք չգտնելու հանգամանքը պայմանավորված է ոչ թե նրանով, որ այսօր աշխատաշուկայում պահանջարկն է ցածր, այլ նրանով, որ գործատուներն ու ընդհանուր առմամբ հանրությունը որոշ կարծրատիպեր ունեն հաշմանդամություն ունեցող անձանց զբաղվածության վերաբերյալ»,-մեզ հետ զրույցում ասում է Ջինա Սարգիզովան:
Նրա փոխանցմամբ` չնայած առկա խնդիրներին` ծրագրի գործունեության շրջանակներում Լոռու մարզից ավելի շատ մարդ է աշխատանքի տեղավորվել, քան մյուս մարզերում:
«Մեր գործունեության շրաջանակներում մեզ ավելի շատ մարդ է հաջողվել հենց Լոռու մարզում աշխատանքի տեղավորել, քան դեռեւս մյուս մարզերում: 14 մարդ արդեն ունի աշխատանք, 15-րդի համար էլ պայմանավածություն ենք ձեռք բերել» :
Անուշ ԲՈՒԼՂԱԴԱՐՅԱՆ
