Մարդու իրավունքների պաշտպան Կարեն Անդրեասյանի քննադատության թիրախում վերջին շրջանում ՀՀ արդարադատության նախարար Հրայր Թովմասյանն է: Օմբուդսմենը անընդհատ քննադատում է Հ. Թովմասյանի ղեկավարած ոլորտում տեղի ունեցող գործընթացները:
Թերևս Թովմասյան-Անդրեասյան հակամարտության վկայությունն է երեկ PanAmenian.net-ի՝ կառավարության նիստի ընթացքում կատարած ֆոտոշարքում տեղ գտած այն լուսանկարը, որում արդարադատության նախարարը մատ է պարզել օմբուդսմենի հետ զրույցում:
Aravot.am-ը Կարեն Անդրեասյանից հետաքրքրվեց՝ ինչո՞ւ էր բորբոքվել նախարարը, իրենք հարաբերություննե՞ր էին պարզում: Օմբուդմսնեը պատասխանեց. «Եթե Դուք նկատի ունեք, որ նախարարն ինձ սպառնում էր, կամ անձնական հարաբերություններ ճշտում, կարող եմ հավաստիացնել, որ նման բան չկա: Ամեն մեկն ինքը կարող է բացատրել իր զգացմունքների արտահայտումը»:
Կարդացեք նաև
Իսկ թե ի՞նչ էին քննարկում Հ. Թովմասյանի հետ, Կ. Անդրեասյանը բացեց որոշ փակագծեր. «Կարող եմ ասել, որ ես Հրայր Թովմասյանի հետ քննարկում էի կոնկրետ խնդիրներ մարդու իրավունքների հետ կապված: Իսկ թե ինչու էր նախարարը էմոցիոնալ, չեմ կարող ասել: Դա գործնական քննարկում էր: Հայտարարում եմ, որ որևէ պետական պաշտոնյայի կամ մարդու հետ այս երկրում ես անձնական խնդիր չունեմ: Հենց ունենայի, այլևս չէի կարող լինել մարդու իրավունքների պաշտպան, քանի որ բոլոր մարդիկ, այդ թվում նաև նախարարները, մի օր կարող են ունենալ իմ պաշտպանության կարիքը»:
Տաթև ՀԱՐՈՒԹՅՈՒՆՅԱՆ
