Տավուշի մարզի առաջին ատյանի դատարանում, Բերդ քաղաքում դեկտեմբերի 11-ի դատական նիստում մեղադրողը՝ Տավուշի մարզի դատախազության ավագ դատախազ Ներսես Չիլինգարյանը պահանջել է Կորյուն Ալավերդյանին դատապարտել 6, իսկ Մասիս Խաչատրյանին՝ 5 տարվա ազատազրկման:
Ամբաստանյալների պաշտպաններ Մհեր Դավթյանը եւ Ռուբեն Հակոբյանը դատարանից պահանջել են արդարացնել իրենց պաշտպանյալներին:
Այս դատավարությունը սկսվել է հոկտեմբերի 23-ին: Ըստ առաջադրված մեղադրանքի՝ Կ. Ալավերդյանը, Մ. Խաչատրյանը Վանաձորի բնակիչ Վահե Թումասյանի հետ 2012թ. հունվարի 18-ին Բերդ քաղաքի բնակիչ Վլադիմիր Վանեսյանի ննջասենյակի պահարանից 38 միլիոն 488 հազար դրամ ընդհանուր արժեքով կանխիկ գումար եւ ոսկեղեն են գողացել: Վահե Թումասյանը հայտնաբերված չէ, նրա նկատմամբ հայտարարված է հետախուզում:
Կարդացեք նաև
Կորյուն Ալավերդյանը եւ Մասիս Խաչատրյանը նախկինում դատված են: 1970թ. ծնված Կորյուն Ալավերդյանը հաշվառված է ՌԴ Դոնի Ռոստով քաղաքում, սական բնակվել է Բերդում, Մասիս Խաչատրյանը հաշվառված է եւ բնակվել է Վանաձորում: Կ. Ալավերդյանին մեղադրանք է առաջադրված ՀՀ քրեական օրենսգրքի 38-177 հոդվածի 3-րդ մասին 1-ին եւ 1.1. կետերով, իսկ Մ.Խաչատրյանին՝ 177 հոդվածի 3-րդ մասին 1-ին եւ 1.1. կետերով:
Ավելի քան 38 միլիոն դրամ արժողությամբ գողոնից ոստիկանները հայտնաբերել են միայն մեկ ոսկե մատանի:
Ամբաստանյալները դատավարության ընթացքում հայտարարել են, որ առաջադրված մեղադրանքում իրենց մեղավոր չեն համարում:
Այս գործով դատական հաջորդ նիստի օրը դեռ որոշված չէ:
Ոսկան ՍԱՐԳՍՅԱՆ
