«Երեխուս ստամոքսի միջից շիլայանման զանգված են հանել, իբր ալկոհոլ են գտել` արյան մեջ: Երեխես ձյուդոիստ էր, սկի կոֆե չէր խմում` իր սպորտի համար: Երեխես մի կաթիլ անգամ ալկոհոլ խմած չկա: Ի՞նչ են սարքում, ինչի՞ են սարքում, հանուն ինչի՞ եք կեղծում, ո՞ւր պիտի հասնեք»,- այսօր նախագահական նստավայրի մոտ հոնգուր-հոնգուր լացելով` բղավում էր մահացած զինծառայող Հովսեփ Մկրտումյանի մայրը` Գրետա Մնացականյանը: Նա եկել էր մասնակցելու «Բանակն իրականում նախաձեռնության » կազմակերպած բողոքի ակցիային` ի պաշտպանություն Մատաղիսի գործով մեղադրվող Արայիկ Զալյանի, Մուսա Սերոբյանի եւ Ռազմիկ Սարգսյանի:
Գրետա Մնացականյանի որդին ծառայել է Ղարաբաղի Մատաղիս գյուղի զորամասում: Նրա համոզմամբ` որդու դին գտել են հունվարի 9-ին, հանել են գետից ու դեռ քթից թարմ արյուն է հոսել, բայց դատական գործում ներկայացվում է, իբրեւ թե Հովսեփին սպանել են դեկտեմբերի 24-ին. «Հունվարի 2-ին երեխուս անվան դիմաց գրված է, որ պիտի գնա մարտական հենակետ են ասում: Եթե մահացած էր,ո՞նց է գնում հերթապահության, ո՞ւր պիտի հասնեն կեղծիքներով, ի՞նչն էր պատճառը, որ իմ ջահել երեխու կյանքը տարաք: Չհասցրեց 19 տարեկանը լրացնի երեխես: Ո՞ւմ համար էր գնում: Սիրով գնում էր` հայրենիքին պաշտպան, մեռներ էդ հայրենիքը: Երեխուս խոհարար էին տանում, ասի` գնա գրվի, ասեց չէ, մամ, գնում եմ հասարակ զինվոր: Մենք քեֆ ենք արել, քեֆով-ուրախությունով ճանապարհեցի երեխուս: Հիմա էլ դատարաններում ձգում են ու ձգում են, չգիտեմ ինչ են որոշում»:
Նա վստահեցնում էր, որ Հովսեփի սպանության համար դատապարտվածների ոչ մեկի ցուցմունքը իրար չի բռնում: Մեղադրյալները չեն իմացել անգամ, որ Հովսեփը ցածրահասակ է եղել. «Ասում էին` բոյովին գցել ենք էս կամուրջից: Դա իմ տղան է եղել, նա բոյով չէ»:
Կարդացեք նաև
Նա պահանջում է պատժել իրական մեղավորներին` հրամանատարին, որը ոչ մի դատական նիստին չի եկել. «Ասե՞ղ էր, որ կորավ դեզի մեջ, չեն կարողանում գտնել»:
Հռիփսիմե ՋԵԲԵՋՅԱՆ
