Այսօր Գյումրու ժուռնալիստների «Ասպարեզ» ակումբում հրավիրած մամուլի ասուլիսի ժամանակ «Ժառանգության» առաջնորդ Րաֆֆի Հովհաննիսյանը հայտարարեց, որ ինքը հաստատ առաջադրելու է իր թեկնածությունը առաջիկա նախագահական ընտրություններում: Եվ մինչ մենք հետաքրքրվում էինք, թե Րաֆֆիի Հովհաննիսյանի դիտարկմամբ` արդյո՞ք Գագիկ Ծառուկյանը կդառնա ընդդիմության միասնական թեկնածու, և այդ դեպքում պատրա՞ստ է պարոն Հովհաննիսյանը հրաժարվել իր առաջադրվելու մտքից ու միանալ ընդդիմադիր մյուս ընկերներին, լրագրողներից մեկը ներս մտավ` հայտարարելով, որ Գագիկ Ծառուկյանը չի առաջադրվելու: Լսելով սա` «Ժառանգություն» խմբակցության ղեկավար Ռուբեն Հակոբյանը այսպես արձագանքեց. «Դա ինձ համար նորություն չէր, մենք միշտ այդ մասին ասել ենք, որ խաղ է գնում, և այդ խաղերի արդյունքում քաղաքական դաշտը բավականին կորուստներ կունենա, այս ամբողջ գործընթացը խաղ է եղել գոնե մեզ համար»:
Իսկ Րաֆֆի Հովհաննիսյանն էլ ասաց, որ ինքը հարգանքով է վերաբերում Գագիկ Ծառուկյանի որոշմանը: «Կարծում եմ այդ որոշման մեջ կա հիմք և՛ հաշվարկ, և՛ իմաստություն , բայց հիմնական քննությունը այն է, թե ինչ շարունակություն է ունենալու այդ խոսքը: Եթե մենք խոսում ենք իրավական, ազգային, քաղաքացիական սահմանադրական դե յուրե պետություն ստեղծելու մասին, և ինքը նույնպես ամեն ինչով հանդերձ նվիրված է այդ ապագային , այդ տեսլականին` դուրս գալու նախորդ կուսակցապետական կոալիցիայի շրջանակներից , ինքը այլևս կարող է այդ խոսքը գործով ապացուցի ու ամբողջացնի: Կսպասենք, թե դա ի՞նչ է նշանակում, խոսքը ինքը հարգանքի արժանի է, դա նշանակում է , որ ամեն ինչ չէ , որ պաշտոնի մասին է, իսկապես հարգում եմ այդ որոշումը, հարցն այն է, թե գործնական ինչ արտացոլանք պիտի գտնի, դրա պատասխանը առաջիկա շաբաթների ընթացքում միասին կտեսնենք», -ասաց «Ժառանգության» առաջնորդը :
Նունե ԱՐԵՎՇԱՏՅԱՆ
