Կապանից 36 կմ հեռու գտնվող Ներքին Հանդ գյուղը դրսի հետ կապող ճանապարհը ձմռան ամիսներին ժամանակ առ ժամանակ փակվում է: Կապան-Ծավ ճանապարհատվածի Ծավ-Ներքին Հանդ խաչմերուկից դեպի գյուղ թեքվող ճանապարհն անմխիթար վիճակում է գտնվում` փոսառատ է, քարուքանդ, ձմռան ամիսներին էլ ձյունից չի մաքրվում, որի պատճառով էլ ձմռանը լուրջ խնդիրների առջեւ են կանգնում հանդեցիները: «Փոսերը շատ են, անմխիթար վիճակում է գտնվում ճանապարհը, եթե մի քիչ շատ է ձյուն գալիս ձմռանը, գյուղի կապը կտրվում է քաղաքի հետ, ոչ մի մեքենա չի կարողանում քաղաք գնալ կամ քաղաքից գյուղ գալ: Ընդհանուր ճանապարհը մաքրվում է, բայց մեր գյուղ եկող այս փոքր հատվածը ձյան մեջ թաղված է լինում», -ասաց Ներքին Հանդ գյուղի բնակչուհի Անահիտ Ոսկանյանը:
Գյուղի բնակիչները տրանսպորտի հետ կապված խնդիրների պատճառով դժվարությունների են բախվում նաեւ տարվա մյուս ամիսներին: Բանն այն է, որ օրական մեկ անգամ է տրանսպորտ աշխատում Կապանից-Ծավ երթուղով եւ Ներքին Հանդի բնակիչները օգտվում են Ծավ գյուղ սպասարկող երթուղային տաքսուց, որը գյուղից շարժվում է առավոտյան ժամերին, իսկ Կապանից վերադառնում է երեկոյան ժամը 5-ին եւ Ծավ-Ներքին Հանդ խաչմերուկից դեպի գյուղ հիմնականում չի թեքվում, ուստի գյուղացիները ստիպված են լինում խաչմերուկից գյուղ ոտքով իջնել: «Բազմիցս է եղել, երբ իջել եմ խաչմերուկում, կաբլուկներս փոխել, դամաշնիկ հագել ու 7 կմ ճանապարհը ոտքով եկել: Չոր եղանակներին դեռ հնարավոր է ոտքով գալ, բայց ձմռանը շատ դժվար է: Բացի այդ, եթե Ներքին Հանդ գյուղի բնակիչն ուզենա առավոտյան ժամերին Կապանից գյուղ գալ, չի կարողանա, գյուղի տրանսպորտը միայն ժամը 5-ին է շարժվում, ստիպված գյուղացիները սպասում են մինչեւ այդ ժամը եւ գազելով ճանապարհ ընկնում: Շատ ժամանակ հարեւանների, գյուղապետի մեքենայով են գնում-գալիս, շատ են օգնում իրար այդ հարցով», – հավելեց գյուղում մեզ հանդիպած մեկ այլ բնակիչ:
Ձմռան ամիսներին լուրջ խնդիրների առջեւ են կանգնում նաեւ մարզի տարածաշրջանների մի շարք այլ գյուղեր: Առատ տեղումների, ճանապարհներին առկա ձյան մաքրման աշխատանքներ չտանելու պատճառով, Սյունիքի հեռավոր շատ գյուղերի կապը դրսի հետ կտրվում է:
Կարդացեք նաև
Մերի ՍՈՂՈՄՈՆՅԱՆ
