Այսօր ցերեկը Մոսկվայում, Խերսոնի փողոց 43 հասցեում բռնկված ուժեղ հրդեհի արդյունքում զոհերի թիվն արդեն իսկ հասել է 10-ի: Եվս յոթը հիվանդանոցում են՝ ծանր այրվածքներով: Ինչպես «Ինտերֆաքսին» հաղորդել է «Տաշիր» ընկերությունների խմբի հասարակայնության հետ կապերի վարչության ղեկավար Մարինա Գազեն, հրդեհին զոհ դարձածները անօրինական կերպով էին հայտնվել «Տաշիր» ընկերությունների խմբին պատկանող «Տաշիր քոնսթրաքշըն» ընկերության կողմից կառուցված գրասենյակային շինության երկրորդ մասնաշենքում:
Մարինա Գազեի խոսքերով՝ այժմ «Տաշիր քոնսթաքշընի» աշխատակիցները փորձում են պարզել, թե ինչպես են զոհվածները հայտնվել այդ շինությունում: «Այդ օբյեկտում շինարարական աշխատանքներն ամբողջությամբ ավարտվել էին: Ոչ մի շինարար այլեւս չէր աշխատում այնտեղ»,-հայտարարել է «Տաշիրի» հասարակայնության հետ կապերի վարչության ղեկավարը: Նա նաեւ «Ինտերֆաքսին» հաղորդել է, որ ներկայումս «Տաշիրի» աշխատակիցները Արտակարգ իրավիճակների նախարարության (МЧС ) աշխատակիցների հետ միասին փորձում են ճշտել պատահարի պատճառները:
Ինչպես հաղորդվում էր հրդեհի մասին տեղեկատվությունը ստանալուն պես՝ հրդեհի զոհերը բանվորներ էին, որոնք փակվել էին կառուցվող շենքի տեխնիկական հարկում: Ասվում էր նաեւ, որ այդ բանվորները ոչ միայն աշխատում էին այդ շենքում, այլեւ՝ բնակվում: Հրդեհն այնքան ուժեղ էր, որ այն հանգցնելու համար հարկավոր է եղել 44 միավոր տեխնիկայի եւ 132 մարդու աշխատանք: Ըստ նախնական տեղեկությունների՝ հրդեհը բռնկվել էր Խերսոնի 43 հասցում գտնվող, անցյակ ամռանը շահագործման հանձնված գրասենյակային եւ բնակելի տարածքներ ունեցող շինության տակ գտնվող ավտոկայանատեղիում: Հրդեհը տարածվել էր 500քմ մակերեսով, այրվում էր հիմնականում շինարարական աղբը: Կարծիք կա, որ հրդեհի պատճառը եղել է չհանգցված սիգարետը:
