15-րդ օրը ԳԱԱ շենքի առջեւ հացադուլ իրականացնող նախագահի թեկնածու Անդրիաս Ղուկասյանը այսօր երկու ժամով է տուն գնացել:
Ինչպես ինքն է պատմում, լոգանքից հետո տնեցիները չեն էլ փորձել հացադուլը շարունակելու որոշումից իրեն հետ կանգնեցնել, որովհետեւ. «Նրանք պատրաստված էին, դեռեւս հունվարի 20-ին կայացած որոշում էր, բնականաբար որեւէ մեկի համար այս իրադրությունը բան չփոխեց, պարզապես անհրաժեշտ գործողություն էր մարմնի հիգիենայի համար»:
Պարոն Ղուկասյանից նաեւ հետաքրքրվեցինք՝ բժիշկներից հարցրե՞լ է՝ հացադուլի թույլատրելի մաքսիմալ ժամկետը, որը առողջական վիճակի համար լուրջ վտանգ չի դառնա. «Ինչի՞ պետք է հարցնեի: Հացադուլը պայմանավորված է սկզբունքների հետ եւ շատ կվնասես, թե քիչ կվնասես առողջությունը, երկրորդական հարց է»:
Պարոն Ղուկասյանը չի տխրում ու չի պատրաստվում դադարեցնել հացադուլը, եթե անգամ նախագահի թեկնածու Պարույր Հայրիկյանի մահափորձով պայմանավորված ընտրությունները հետաձգվեն: Նա ասաց՝ գնալու է մինչեւ վերջ:
Կարդացեք նաև
Չնայած Հայաստան ժամանած եվրոպացի ու ԱՊՀ դիտորդները դեռ շաբաթներ առաջ էին հայտարարել, որ պատրաստվում են հանդիպել նախագահի բոլոր թեկնածուների հետ, սակայն պարոն Ղուկասյանին դեռ չեն տեսել. «Ինձ համար բացարձակ միեւնույնն է, ես տվել եմ նրանց աշխատանքի գնահատականը: Դիտորդները ծառայում են, սատարում են մեր երկրում քրեաօլիգարխիկ համակարգի վերարտադրմանը»:
Տեղեկացնենք նաեւ, որ այսօր երեկոյան պարոն Ղուկասյանին են այցելել «Ժառանգություն» կուսակցությունից Ստյոպա Սաֆարյանը եւ քաղաքագետների միության նախագահ Հմայակ Հովհաննիսյանը:
Արփինե ՍԻՄՈՆՅԱՆ
