Այն սկսվում է փետրվարի 11-ին և ավարտվում մարտի 30-ին
Պահեցողության առաջին պատվիրանը Աստված մարդուն դեռևս դրախտում տվեց. «Դրախտում ամեն ծառի պտուղներից կարող եք ուտել, բայց բարու և չարի գիտության ծառից մի՛ կերեք»: Պահքն առհասարակ հավատացյալ մարդուն մոտեցնում է սրբերին ու Աստծուն:
Այս տարի Մեծ պահքը մեկնարկում է փետրվարի 11-ին և ավարտվում մարտի 30-ին` Հիսուս Քրիստոսի հարության` Ս. Զատկի նախօրյակին։
Այսօր «Հենարան» մամուլի ակումբում Մայր Աթոռի թանգարանների եւ արխիվների տնօրեն տեր Ասողիկ քահանա Կարապետյանը նշեց, որ պահքը լինում է օրական և շաբաթական:
Կարդացեք նաև
«Վերջինս պահքի այն տեսակն է, երբ տևում է հավաքական մի քանի շաբաթ: Պահքի խորհուրդը կենդանական ծագում ունեցող սննդից կտրականապես հրաժարվելն է: Ի դեպ, հոգևոր պահքն առանց ֆիզիկականի լիակատար չի լինի»,- հավելում է տեր Ասողիկը:
Գրականագետ, ՀՀ ԳԱԱ Գրականության ինստիտուտի փոխտնօրեն Վարդան Դեւրիկյանը նշում է, որ դեռ միջնադարում գոյություն ուներ պահքի մի քանի տեսակ` կամավոր, հարկադրական, պարտադիր: Նրա կարծիքով՝ եկեղեցական այս տոնը, ինչպես նաև այլ տոներ, սերտ կապեր ունեն մեր ազգային տոների ու սովորույթների հետ:
«Մեծ պահքին նախորդում եւ հաջորդում են Վարդանանց և Սահակ Պարթեւի տոները: Կարծում եմ, որ մեր եկեղեցու հայրերը տոնացույցը կազմելիս ազգային տոները եւս հաշվի են առել»,-նշեց գրականագետը:
Սեւակ ՎԱՐԴՈՒՄՅԱՆ
