Ամբաստանյալը չընդունեց իր մեղքը:
Տավուշի մարզի առաջին ատյանի դատարանի Իջեւանի նստավայրում սկսվել է Նոյեմբերյան քաղաքից սերված, Կողբ գյուղում ժամանակավորապես բնակվող, 1988թ. ծնված Անուշավան Մաճկալյանի դատավարությունը:
Վերջինիս մեղադրանք է առաջադրվել այն բանի համար, որ նա 2012թ. օգոստոսի 30-ին, ժամը 22:00-ի սահմաններում, գտնվելով ոգելից խմիչքի ազդեցության տակ, Տավուշի մարզի Բերդավան գյուղի «Միստրեստ» հանդամասում, օգտագործելով Բերդավանի բնակչուհի, 1999թ. ծնված աղջկա անօգնական վիճակը, նրա կամքին հակառակ սեռական հարաբերություն է ունեցել վերջինիս հետ:
Կարդացեք նաև
Անուշավան Մաճկալյանին մեղադրանք է առաջադրվել ՀՀ քրեական օրենսգրքի 138 հոդվածի 3-րդ մասով («Անչափահասի նկատմամբ բռնաբարությունը»): Նրան այդ հոդվածով սպառնում է 8-15 տարի ազատազրկում: Ա. Մաճկալյանը նախկինում դատվել է ՀՀ քրեական օրենսգրքի 359 հոդվածի 1-ին մասով («Զինծառայողների փոխհարաբերությունների կանոնագրքային կանոնները խախտելը՝ նրանց միջեւ ստորադասության հարաբերությունների բացակայության դեպքում»), նրա դատվածությունը մարված չէ: Նշենք, որ նա ամուսնացած է, ունի անչափահաս երկու երեխա՝ երկու եւ մեկ տարեկան:
Մարտի 26-ին կայացավ սույն գործով դատական նիստ: Մեղադրանքը դատարանում պաշտպանում է Տավուշի մարզի դատախազի տեղակալ Սպարտակ Անտոնյանը, ամբաստանյալին պաշտպանում է փաստաբան Անահիտ Ալոյանը: Դատավոր Ռաֆիկ Մելքոնյանը հարցրեց Անուշավան Մաճկալյանին, թե նա առաջադրված մեղադրանքում իրեն մեղավոր ճանաչո՞ւմ է: Վերջինս ասաց, որ իրեն մեղավոր չի ճանաչում: Դատախազի կողքին նստել էր տուժած աղջիկը: Նա, ըստ քրեական գործի տվյալների, մտավոր զարգացման խնդիրներ ունի:
Դատախազ Ս. Անտոնյանը, նկատի ունենալով, որ քրեական գործը վերաբերում է անչափահասին եւ նրա հետ կատարված սեռական գործողությանը, միջնորդեց ապացույցների հետազոտությունը կատարել դռնփակ ռեժիմով: Ամբաստանյալը կողմ էր հրապարակային, դռնբաց դատավարությանը: Դատավոր Ռաֆիկ Մելքոնյանը պարզաբանեց, որ նման գործերով ապացույցների հետազոտումը դռնփակ է անցկացվում, որ դա քրեական դատավարության օրենսգրքի պահանջն է: Այնուհետեւ դատական նիստն ընթացավ դռնփակ:
Ոսկան ՍԱՐԳՍՅԱՆ
