Ապրիլ 24-ի նախօրեին «Լուսակն» հրատարակչությունը լույս է ընծայել լրագրող Թաթուլ Հակոբյանի «Հայացք Արարատից. հայերը և թուրքերը» գրքի անգլերեն հատորը: Գրքի խմբագիրը Նարեկ Սեֆերյանն է, թարգմանիչները՝ Հեղինար Մելքոմյանն ու Հրանտ Կատարիկյանը:
Մեկ տարի գիրքը լույս էր տեսել արևմտահայերենով, մեսրոպյան ուղղագրությամբ Բեյրութում, ապա Երևանում՝ արևելահայերենով:
«Հայերը և թուրքերը» անգլերեն հատորի առաջաբանում գրքի մասին կարծիքներ են ներկայացրել Հայաստանի նախկին արտգործնախարարներ Ռաֆֆի Հովհաննիսյանը, Ալեքսանդր Արզումանյանn ու Վարդան Օսկանյանը, ինչպես նաև պատմաբան, հետազոտողներ Վիգեն Չեթերյանը (Ժնև), Արա Սանջյանը (Մինչիգան) և Գևորգ Յազըճյանը (Բեյրութ-Երևան):
Թաթուլ Հակոնյանի առաջին գիրքը՝ «Կանաչ ու սև. արցախյան օրագիր», 2008-ից ի վեր ունեցել է ութ հրատարակություն, թարգմանվել ռուսերեն, անգլերեն, արևմտահայերեն, գերմաներեն, թուրքերեն և արաբերեն:
Կարդացեք նաև
Հեղինակի գրքերը կարելի է ձեռք բերել Երևանի «Նոյյան Տապան», «Բուկինիստ», «Բյուրոկրատ» գրախանութներից, «Արթբրիջ» սրճարան-գրատնից, ինչպես նաև՝ անձամբ հեղինակից:
Թաթուլ Հակոբյանը աշխատում է իր երրորդ գրքի վրա, որը կրում է «Հայաստանը 88-ից հետո. ավտորիտարիզմի և ժողովրդավարության փակուղում» պայմանական վերնագիրը: Այն լույս կտեսնի 2015 թվականին:
