Իրավաբան Գևորգ Հայրապետյանն այսօր «Մեդիա» կենտրոնում անդրադառնալով ընտրությունների լուսաբանմանը, մասնավորապես լրագրողների իրավունքներին և պարտականություններին, ասաց, որ լրագրողները իրավունք ունեն ներկա գտնվելու ընտրատեղամասերում, նկարահանել ընթացքը, պահանջել հանձնաժողովի անդամներից փաստաթղթեր, եթե ընտրացուցակներում կան որոշակի կասկածելի տվյալներ և անհրաժեշտ է ճշգրտումներ կատարել: «Լրագրողները կարող են նկարահանել, տեսագրել, որևէ արգելք օրենսդրորեն չկա, միանշանակ չխախտելով ընտրական ընտրակարգը»:
Ըստ բանախոսի` եթե լրագրողը ներկայանում է որևէ լրատվամիջոցից որպես լրագրող, սակայն նույն տարածքում ընտրակարգը չխախտելով անում է տեսագրություններ, ապա ընտրական հանձնաժողովի անդամները, դիտորդական առաքելություն իրականացնող անձինք կամ կողմնակի անձ, որևէ կերպ չեն կարող խոչընդոտել լրագրողի աշխատանքին: «Պարտադիր չէ, որ վրան փակցված լինի նաև օպերատոր կամ ֆոտոլրագրող, որպեսզի կարողանա իրականացնել նաև այդ գործառույթները, եթե այդ պահին գտնում է դրա անհրաժեշտությունը, ապա հանգիստ կարող է կիրառել` չենթարկվելով որևէ պատասխանատվության»:
Իրավաբանի փոխանցմամբ, հավատարմագրման կարգը միտված է ընտրությունները թափանցիկ անցկացնելու համար, որն ուղղված է հանձնաժողովի անդամներին և լրագրողներին: «Եթե արգելք է իրականացվում, ապա սա չի խոսում թափանցիկության մասին, այլ գաղտնիությանն է վերաբերում»:
Քրիստինա ՄԻՐԶՈՅԱՆ
