Էստոնիայում հայ արվեստագետները հանդես եկան հայ մշակույթի տարածմամբ
Հունիսի 27-ին երեկոյան, Մումբա լաունջ ակումբում (Moumba Lounge Club) տեղի ունեցավ «Կտեսնվենք Տալլինում» հայ-էստոնական մշակութային առաքելության ամփոփիչ երեկույթը (AFTER PARTY “SEE U IN TALLIN” ):
Երեկույթին բացման խոսքով հանդես եկավ միջոցառման կազմակերպիչ SPRING PR-ընկերության համահիմնադիր Տաթև Սիմոնյանը և ներկայացրեց էստոնիայի մայրաքաղաք Տալլին հայ պատվիրակության այցելության մշակութային արշավի, ինչպես նաև Ֆինլանդիայում հայերի աննախադեպ արկածների մասին պատմող տեսանյութեր:
«Կտեսնվենք Տալլինում» նախագիծն անցկացվել է հունիսի 12–16–ը: Այս ընթացքում Երևանից Էստոնիայի մայրաքաղաք Տալլին են մեկնել շուրջ երեք հարյուր հյուրեր, ովքեր այնտեղ հանդես են եկել եւ ներկայացրել իրենց տաղանդը: Ծրագիրը եղել է որպես «Բոլորը գնում են Երևան» ժողովրդական դիվանագիտության առաքելություն քաղաքացիական նախաձեռնության հաջորդող ծրագիր:
«Մեզ այնտեղ դիմավորեց Էստոնիայի հայկական համայնքի ղեկավար Ռազմիկ Իվանյանը, պատվիրակությանը հյուրընկալեց նաև Էստոնիայի ազգային ժողովի փոխխոսնակ Լայնե Ռանդյարվը, անմիջական հանդիպման ընթացքում նա պատասխանեց հայ լրագրողների և մշակույթի գործիչների հարցերին, պաշտոնական մասին հաջորդեց հյուրասիրությունը»,- ասաց Տաթև Սիմոնյանը:
Այն հարցին, թե հաջորդ երկիրը որը կլինի, Տաթև Սիմոնյանը չկարողացավ հստակ ասել, քանի որ դեռես այդ հարցի շուրջ քննարկումներ չեն եղել:
Ինչպես հայտնեց՝ տեղի է ունեցել Cross Road blues band-ի 3 համերգները Տալլինի տարբեր առաջատար ակումբներում` Չիկագո, Նյու Յորք Սիթի, Krahli baar: Համերգներով հանդես են եկել նաեւ Արմեն Հյուսնունցի Շարակ բենդը, «Արահետ» երգչախումբը, «Նարեկացի» նվագախումբը, In Coma ռոք բենդը, ինչպես նաեւ Համազգային պետական թատրոնը, անցկացվել են Երևանից մեկնած նկարիչներ` Տիգրան Սահակյանի, Արման Վահանյանի, Տիգրան Կիրակոսյանի և Աշոտ Գրիգորյանի ցուցահանդեսները, կայացել է հայազգի բանաստեղծուհի Ազնիվ Սահակյանի և էստոնուհի բանաստեղծուհի Loone Ots-ի հանդիպումը, շարունակական ստեղծագործական երեկույթների ձևաչափով:
Երեկույթի կայացմանը աջակցել է Մումբա լաունջ ակումբի համահիմնադիր Սեւակ Կոստանյանը: Ինչպես հայտնեց՝ Կանադայից երկու տարի առաջ է ընտանիքով Հայաստան վերադարձել եւ սիրով աջակցում է նման միջոցառումներին:
«Կտեսնվենք Տալլինում» նախագծի կազմակերպիչներն են`Մելիս Կուբիտց, Էստոնիայի հայկական համայնք, SPRING PR-ընկերություն, Ars Lunga դուետ, Impro Barbarella հասարակական կազմակերպություն:
Ռուբինա ՍԱՖԱՐՅԱՆ
