«Կամավորական ջոկատի հիմքն ենք ուզում դնել, պատրաստ կլինենք ցանկացած պահի մարտնչել թշնամու դեմ: Մոտ 40 կամավորներ են հավաքվել: Մենք թե հոգեպես, թե ֆիզիկապես պատրաստվելու ենք պաշտպանել մեր հայրենքիը»,-այսօր Aravot.am-ի հետ զրույցում նշեց «Կամավորական ջոկատ»-ի հրամանատար Արտավազդ Սարուխանյանը:
Պատերազմական սպառնալիքի պայմաններում արդեն մեկ շաբաթ է, ինչ «Հայազնը» կոչ է ուղղում հայրենապարտ եւ քաղաքացիապես գործուն երիտասարդությանն այսօրվանից նախապատրաստվել հավանական պատերազմին, կազմակերպված մասնակցելուն`մասնավորապես կազմավորել կամավորական ջոկատներ:
Որպես գործնական առաջին քայլ, այսօր կլինի առաջին հանդիպումը կամավորական ջոկատների շարքերը համալրել ցանկացող երիտասարդների հետ:
Պարոն Սարուխանյանի պնդմամբ՝ պարապունքներ են անցկացվելու մարտական պատրաստվածության, կանոնադրական եւ ֆիզիկական կողմերով: Օգոստոս ամսին կամավորները գնալու են Արցախ, այնտեղ տեղի կունենան առաջին պարապունքները: Նպատակն է՝ պաշտպանել հայրենիքը, քանի որ թշնամու սպառնալիքները բավականին լուրջ են. «Ունենք հզոր բանակ, բայց դա չի նշանակում, որ քաղաքացիները պետք է հանգիստ տանը նստեն, հասարակությունը պետք է պատրաստ լինի պատերազմին: Իրականությունից փախչել հնարավոր չէ: Թշնամին միշտ պատրաստ է, մենք էլ պետք է պատրաստ լինենք»:
Կամավոր Արմեն Մկրտչյանի խոսքով՝ նրանք ցանկություն ունեն հայոց բանակի կողքին ստեղծել կամավորական զորամիավորում.
Կարդացեք նաև
«Պատրաստ եմ հարկ եղած դեպքում կանգնել իմ հայրենիքի կողքին, որպես զինվոր: Շարժումը իր նպատակին կհասնի, դրանում համոզված եմ, որովհետեւ ցանկացած անկեղծ նախաձեռնություն ի վերջո հաղթանակի է հասնում: Անվտանգության մեծագույն խնդիր ունի մեր երկիրը, թշնամին ամեն օր հայտարարում է պատերազմի մասին, դա նշանակում է, որ մեր երկիրը բավականաչափ պաշտպանված չէ, թշնամին ունի համարձակություն ինչի դիմաց պետք է պայքարել: Մենք մեր հողերի համար ենք պայքարելու, կուռ ու ամուր ենք լինելու»:
Անժելա ՇԱՀՈՒՄՅԱՆ
