Նոյեմբերյանի համայնքի ավագանու օգոստոսի 16-ի նիստի օրակարգում քաղաքապետ Վանուշ Ամիրաղյանի առաջարկությամբ ընդգրկվել էր քաղաքի թիվ 1 մանկապարտեզի սպասարկման տարածքից 25.1 քառակուսի մետր հողամասի աճուրդով օտարման հարցը: Քաղաքապետն ասաց, որ ավագանու նախորդ նիստում այդ հարցը քննարկվել եւ ավագանու անդամների նախնական համաձայնություն է ձեռք բերվել:
Վ. Ամիրաղյանը հայտնեց, որ տվյալ, եռանկյունաձեւ հողամասը գտնվում է մանկապարտեզի մուտքի մոտ: Քաղաքապետն ասաց, որ մանկապարտեզի տարածքից 25 քառակուսի մետր առանձնացրել են, դրա համար անշարժ գույքի կադաստրի տարածքային ստորաբաժանումից ձեռք բերել վկայական: Ավագանու անդամների քվեարկությամբ այդ հողամասի աճուրդային կարգով վաճառքի մեկ քառակուսի մետրի մեկնարկային գին սահմանվեց 1500 դրամը:
Նշենք, որ այդ տարածքը գտնվում է քաղաքապետարանի շենքից մոտ 50 մ հեռավորության վրա: Նոյեմբերյանում շատերը գիտեն, որ տվյալ հողամասը աճուրդային վաճառքի է դրվել քաղաքապետի քենակալի համար, ով Նոյեմբերյան քաղաքի գործարարներից է: Նոյեմբերյանում, ինչպես նաեւ Տավուշի մարզի մյուս քաղաքներում, հողամասերի վաճառքի աճուրդները կրում են ձեւական բնույթ, դրանց հաղթողները նախապես հայտնի են: Նոյեմբերյան քաղաքի բազմաթիվ բնակիչներ «Առավոտի» թղթակցին բողոքել են մանկապարտեզի տարածքից հող առանձնացնելու եւ այն օտարելու որոշման դեմ, դա համարելով անթույլատրելի:
Կարդացեք նաև
Ոսկան ՍԱՐԳՍՅԱՆ
