Այսօր «Մեդիա» կենտրոնում Ժուռնալիստների ասպարեզ ակումբի նախագահ Լեւոն Բարսեղյանի ներկայացուցիչ, իրավաբան Արտակ Զեյնալյանը խոսեց Բարսեղյանի՝ 2011 թվականին հարուցված գործի ելքից, որով խախտվել էին նրա պաշտպանյալի իրավունքները:
Զեյնալյանի համոզմամբ՝ գործի էությունը կայանում էր հետեւյալում՝ իրականում ոստիկանների նպատակն էր արգելել մարդուն՝ իրացնել իր խաղաղ հավաքներին մասնակցելու իրավունքը, ինչը քողարկվում էր, սակայն ի վերջո Վարչական դատարանն արձանագրեց, որ ոստիկանների գործողությունները եղել են ոչ իրավաչափ ու բավարարվեց Բարսեղյանի հայցը:
Զեյնալյանը գտնում է՝ «Վճռաբեկ որոշումը նախադեպային է այնքանով, որքանով բոլոր մարդիկ հավասար են օրենքի առաջ, ու սա պարտադիր է նաեւ մյուս դատարանների համար: Յուրաքանչյուր անձ նման փաստական հանգամանքներում կարող է ակնկալել, որ նույն ելքը կլինի: Մեր նպատակն էր ստեղծել այսպիսի օրինակելի գործ, տարածել, որ մարդիկ իրենց իրավունքները կարողանան պաշտպանել»:
Զեյնալյանը ավելացրեց, որ շարունակելու են այս գործընթացը, սակայն չմանրամասնեց, թե ինչ են անելու:
Կարդացեք նաև
Մեկնաբանելով ներքաղաքական իրավիճակը՝ իրավաբանը հետեւյալն ասաց.
«Եթե Հայաստանը մտնում է, այսպես կոչված Սովետական Միության կազմի մեջ, ուրեմն եվրոպական հեռանկարը պետք է մոռանալ: Իսկ Սովետական Միությունը կամ Ռուսաստանի Դաշնությունը շատ-շատ հեռու է իրավունքից: Դրա համար բավարար է կարդալ եվրոպական իրավունքի վճիռները Ռուսաստանի դեմ: Մենք այսօր ՌԴ-ից, այս վիճակով անգամ, շատ առաջ ենք:
Մեր խառնվածքը, մեր երազանքը Եվրոպան է, որտեղ իրավունքների պաշտպանություն կա: 2011թ. սեպտեմբերի 21-ին, երբ Լեւոն Բարսեղյանը պլակատներ էր գրում, որ «Հայաստանը Ռուսաստանի մաս չէ», «Հայաստանը անկախ պետություն է»՝ հենց սրա համար էր գրում»:
Եվա ՀԱԿՈԲՅԱՆ
