Արարատ քաղաքում ավարտվել են քաղաքապետի ընտրությունները: Այժմ ընտրատեղամասերում սկսվել է քվեաթերթիկների հաշվարկը: Արարատ քաղաքի թիվ 18/06 ընտրատեղամասում ԲՀԿ կուսակցության թեկնածու Սամվել Բարսեղյանի վստահված անձը ԲՀԿ ԱԺ պատգամավոր Տիգրան Ուրիխանյանն է:
Aravot.am-ը հետաքրքրվեց պատգամավորից՝ ինչո՞վ է պայմանավորված Արարատ քաղաքի քաղաքապետի ընտրությունների նկատմամբ ԲՀԿ-ի այսքան մեծ հետաքրքրությունը, մի՞թե անվստահություն կա, երբ պատգամավորներն անձամբ են հետեւում ընտրական գործընթացին եւ հանդես գալիս որպես վստահված անձինք. «Հայաստանյան վերջին ընտրությունները անձամբ ինձ մոտ առաջացրել են շատ հստակ համոզմունք, որ այո, անհրաժեշտ է կիրառել բոլոր վերսահսկողական մեխանիզմները ընտրություններում օրինականությունը պահպանելու համար»,- ասաց պատգամավորը եւ նշեց, որ իրենք մշտապես իրենց մտահոգությունն են հնչեցրել ընտրական օրենսգրքի վերաբերյալ եւ հանդես են եկել ընտրակարգի փոփոխությունների առաջարկներով:
Պարոն Ուրիխանյանը հաստատեց. կար անվստահություն, որ Արարատում ընտրությունները ընտրակեղծիքներով կլինեն: Իր՝ վստահված անձ լինելու մասին էլ ասում է. «Որպես իրավաբան, պետաիրավական հարցերի հանձնաժողովի անդամ, ընտրական օրենսգրքի տիրապետող անձ, վստահված անձի կարգավիճակով կարող եմ վերահսկողություն իրականացնել ընտրական գործընթացի վրա: Վստահ եմ, ԲՀԿ-ից իմ գործընկերները, հանձնաժողովի անդամները նույնպես դա կանեն»:
Այնուամենայնիվ Տիգրան Ուրիխանյանը հույս ունի, որ այս ընտրություններում ամեն ինչ անցնի կարգով ու օրենքով. «Ուզում եմ հուսալ, որ վերջնական արդյունքը կհամապատասխանի ժողովրդի քվեին»:
Կարդացեք նաև
Ավելացնենք՝ թիվ 18/06 տեղամասում 1715 քաղաքացուց ընտրել է 1185-ը:
Հռիփսիմե ՀՈՎՀԱՆՆԻՍՅԱՆ
Էդպես էլ եղավ-վերջնական արդյունքը ապահովվեց ժողովրդի քվեն… տրված փողի դիմաց…
Ով, ով, գոնե դուք լռեք: ՀՀԿ-ից ինչո՞վ է ԲՀԿ-ն տարբերվում: Կարելի է կարծել Կոտայքի մարզում բոլոր ընտրություններում ԲՀԿ-ի հաղթանակը առանց կաշառքի ու օրենքներին համապատասխան է եղել: