Այսօր Շիրակի մարզի ընդհանուր իրավասության դատարանում կայանալու էր Վարդան Ղուկասյանի դստեր փեսացու` Կարեն Եսայանի սպանության գործով դատավարությունը, որը երեկ տեղի չէր ունեցել ամբաստանյալ Հարություն Սարգսյանին մայրաքաղաքից Գյումրի չտեղափոխելու պատճառով:
Այսօր ևս դատական նիստը չկայացավ` այն նույն պատճառաբանությամբ, թե փչացել է դատապարտյալներին տեղափոխող մեքենան: Սակայն դատարանի միջանցքում մեզ տեղեկություններ հասան այն մասին, որ թեև դատապարտյալների մեքենան բանի պետք չէ, այդուհանդերձ այն փչացած էլ չէ: Ըստ այդ խոսակցությունների, երեկ Շիրակի մարզի ոստիկանապետ Կարեն Բաբակեխյանը գրություն է ուղարկել դատարան, թե չի կարող ապահովել ամբաստանյալի անվտանգությունը, քանի որ այդ նույն մեքենայով այդ նույն ժամին Գյումրի էին տեղափոխում Մուշ բաժնի քրեական հետախուզության բաժանմունքի պետի նախկին տեղակալ Հրաչ Քալաշյանին և նույն բաժնի նախկին օպերլիազոր Արտակ Բադալյանին: Այս երկու ոստիկանները այժմ նույնպես դատապարտյալներ են, նրանք մեղադրվում են Գյումրու «Ռուբին» ոսկերչական սրահը թալանելու անհաջող փորձ կատարելու մեջ:
Ըստ ամբաստանյալի հարազատների, ժամանակին Հրաչ Քալաշյանը ակտիվ մասնակցություն է ունեցել իրենց որդու ձերբակալման մեջ, Կարեն Եսայանի դիակը դեռ չհայտնաբերած, և դեռ չպարզած` նա մահացած է, թե ողջ, այս ոստիկանը արձանագրել է, որ Հարություն Սարգսյանն է սպանել Կարենին: Մի խոսքով, սա պատճառ է դարձել, որ նախկին ոստիկանին ու Հարություն Սարգսյանին միասին չտեղափոխեն նույն մեքենայով:
Սակայն անհասկանալի էր այսօր ևս Հարություն Սարգսյանին մայրաքաղաքից չտեղափոխելու հանգամանքը. արդեն անլուրջ է լսել, թե դատապարտյալների մեքենան փչացած է: Երբ դատավոր Մարտին Սարոյանը հայտարարեց դատական նիստի հետաձգման պատճառը` ասելով . «Ուղեկցողները երեկ քրեակատարողական հիմնարկից պատճառաբանեցին, որ մեքենան անսարք է, այսօր ամբաստանյալի ներկայությունը չեն ապահովել նույն պատճառաբանությամբ», ամբաստանյալի մայրը պարզաբանում խնդրեց դատավորից:
Կարդացեք նաև
Դատը հետաձգվեց` նշանակվելով նոյեմբերի 27-ին:
Նունե ԱՐԵՎՇԱՏՅԱՆ
