Պատմության մեջ առաջին անգամ Հայաստանում մրցաշրջանի ավարտին կազմվեց լավագույն մարզիկների երկու տասնյակ՝ մարզական լրագրողների ֆեդերացիայի, որը 10 լավագույններին որոշում է 1958 թվականից, եւ ՀՀ սպորտի եւ երիտասարդության հարցերի նախարարության:
Յոթ մարզիկներ՝ Դավիթ Սաֆարյանը, Արթուր Ալեքսանյանը, Արսեն Ջուլֆալակյանը, Ռոման Ամոյանը, Աշոտ Դանիելյանը, Մուսա Մուրթազալիեւը եւ Արթուր Ավագյանը, տեղ են գտել երկու տարբերակներում էլ, իսկ ահա մյուս երեք տեղերը տասնյակներում բաշխվել են տարբեր մարզիկների միջեւ: Արթուր Դավթյանը (սպորտային մարմնամարզություն), Մաքսիմ Մանուկյանը, Արթուր Շահինյանը (երկուսն էլ՝ հունահռոմեական ըմբշամարտ) ՄԼՀՖ-ի ցուցակում են, իսկ ֆուտբոլիստներ Յուրա Մովսիսյանը, Հենրիխ Մխիթարյանը եւ սամբիստ Տիգրան Կիրակոսյանը՝ նախարարության:
Ո՞ր տասնյակն է առաջնային, պաշտոնական՝ պարզ չէ: Հայտնի է միայն, որ մոտ օրերս կայանալու է մրցաշրջան 2013-ի երկու ամփոփում: Հայաստանի ազգային օլիմպիական կոմիտեն Ճանաչում է եւ տարեվերջյան իր միջոցառման ժամանակ մեծարելու եւ պարգեւատրելու է ՄԼՀՖ-ի տարբերակի տասնյակին, պետական կառույցը՝ իր:
Ըստ էության, առանձնապես կարեւոր չէ, թե քանի՞ հոգի եւ ի՞նչ պարգեւներ կստանան: Թող շատ լինեն: Խնդիրը մեր պատկերացմամբ այլ է: Հայաստանն, ի վերջո, 2013 թվականի տասնյակում քանի՞ լավագույն մարզիկ ունեցավ՝ 10, թե՞ 13:
Կարդացեք նաև
Աշոտ ՀԱԿՈԲՅԱՆ
