Դեկտեմբերի 25-ին տեղի ունեցավ «Հայտնիր քո կարծիքը» երիտասարդական դպրոցի շրջանակներում կազմակերպված «Բանավեճի հիմունքներ» երկամսյա դասընթացի եզրափակիչ արարողությունը: Դպրոցին մասնակցելու հայտ էր ներկայացրել մոտ 70 երիտասարդ, որոնցից ընտրվել էին 35-ը, ովքեր էլ ստացան հավաստագրեր:
Շուրջ մեկ ամիս տևողությամբ դպրոցի մասնակիցները հաղորդակցվեցին բանավեճի արվեստի հմտություններին՝ ուսումնասիրելով «Բանավեճերի տիպաբանություն», «Թիմային աշխատանք», «Աշխատանք սկզբնաղբյուրների հետ», «Հռետորություն», «Փաստարկման տեսություն», «Կիրառական հոգեբանություն» և հարակից այլ թեմաներ:
Մասնակիցների պարգևատրման արարողությանը ներկա էր նաև Հայաստանի երիտասարդական հիմնադրամի հոգաբարձուների խորհրդի համակարգող Կարեն Ավագյանը։ Նա կարևորեց ցանկացած նախաձեռնություն, որի շուրջ տեղի է ունենում երիտասարդական համախմբում։ Հիմնադրամի համակարգողի հետ դպրոցի մասնակիցներն ունեցան անկեղծ երկխոսություն: Կարեն Ավագյանը մասնակիցների հետ քննարկեց դպրոցի հետագա հեռանկարները, ծրագրի շարունակական դառնալու ուղիները։ Երիտասարդները ներկայացրին մասնակցության իրենց մոտիվները և դպրոցից ստացած արդյունքները:
Երիտասարդական դպրոցի ղեկավար Լևոն Նազարյանը նշեց, որ դպրոցի մասնակիցները ցուցաբերել են նոր նախաձեռնություն և որոշել են այսուհետև դպրոցի մասնակցից վերածվել դպրոցի գաղափարների տարածողների և հրավիրել հաջորդ մեկնարկի մասնակիցներին, որով էլ «Հայտնիր քո կարծիքը» դպրոցը կտարբերվի երիտասարդական դաշտում գործող այլ ծրագրերից:
Նշենք, որ «Հայտնիր քո կարծիքը» երիտասարդական դպրոցը կազմակերպվել է «ՄԵՆՔ- երիտասարդ նորարարների կենտրոն» հասարակական կազմակերպության և Հայաստանի երիտասարդական հիմնադրամի կողմից։
Հայաստանի երիտասարդական հիմնադրամի
հասարակայնության հետ կապերի ծառայություն
