«Ճիշտն ասած, ես կարծում էի, որ Սերժ Սարգսյանը ձեռնպահ կմնա ուղղակիորեն միջամտելու այս բանավեճին և իր համար կապահովագրի շահեկան մի իրավիճակ, երբ ինքը կհայտնվի թագավորի դերում, որը չի շտապում իր գահը զիջելու»,-Aravot.am-ի հարցին` ինչպե՞ս կարձագանքի «Առավոտի» հարցին ի պատասխան ՀՀ նախագահի արձագանքին Քոչարյան-Սարգսյան հեռակա բանավեճի մասին, այսպիսի կարծիք հատնեց Հայաստանի քաղաքագետների միության նախագահ Հմայակ Հովհաննիսյանը:
Շարունակելով միտքը՝ նա ասաց. «Ես կարծում էի, որ ՀՀ նախագահը չի միջամտի` մնալով իր բարձրության վրա: Բայց իմ լավատեսությունը չիրականացավ նա միջամտեց: Այստեղ հարց է նաև, թե ինչպիսին կլինի Քոչարյանի պատասխանը»:
Հարցին` ՀՀ նախագահի արձագանքից հետո կարելի՞ է ասել, որ վարչապետի հեռացման հարցը փակված է, պարոն Հովհաննիսյանն այսպես պատասխանեց. «Այն, որ Սերժ Սարգսյանը չի նախատեսում վարչապետին փոխել, վաղուց է հայտնի, դա նորություն չէ: Բայց որ վարչապետի հեռացման պահանջ է ներկայացնում ընդդիմությունը, սա ևս փաստ է: Հետագա զարգացումները ցույց կտան, թե նորին գերազանցություն հասարակությունը ինչ կեցվածք կորդեգրի, արդեն առաջիկա ամիսներին պարզ կլինի»:
Կարդացեք նաև
ՀԱԿ ներկայացուցիչ Վահագն Խաչատրյանին ընդհանրապես այս ամենը չի հետաքրքրում: Մեզ հետ զրույցում նա այսպիսի կարծիք հայտնեց. «Խնդիրը ոչ միայն վարչապետի, այլ ընդհանուր իշխանության մեջ է: Ես կոնկրետ այս հարցում չեմ ուզում խորանալ, ասելիք չունեմ, և քանի դեռ ամեն ինչ այս հունով է գնում, իշխանությունը անելիք չունի, պետք է թողնի հեռանա»:
Տաթև ՀԱՐՈՒԹՅՈՒՆՅԱՆ
