ԱԺ «Ուժեղ Հայաստան» խմբակցության ղեկավար Նարեկ Կարապետյանն այսօր առավոտյան եղել է ԱԺ-ում, երբ տեղեկացել է, որ իր տանը խուզարկություններ են սկսվել։ Լրագրողների հետ զրույցում նա պատմեց, որ այդ պահին տանը եղել են երեխաները և ընտանիքի անդամները։
Հարցին՝ արդյոք երեխաներն էլ են արդեն ընտելացել դիմակավորված անձանց այցելություններին, Կարապետյանը կատակեց. «Փոքրն ուրախացել էր…Ամեն անգամ նույն բառերն են բերում, մտնում, խուզարկում»։
Անդրադառնալով պաշտոնական տեղեկատվությանը, ըստ որի՝ խուզարկություններն իրականացվում են Տնտեսական հանցագործությունների և մաքսանենգությունների վարչությունում քննվող քրեական վարույթի շրջանակում, Կարապետյանն արձագանքել է.
Կարդացեք նաև
«Ինձ թվում է՝ այդ վարույթը մի քիչ ուրիշ վարույթ է։ Նիկոլ Փաշինյանի՝ ընդդիմադիրներին համոզելու գործընթացն է։ Հիմա ուզում է մեզ համոզել, որ կարողանա Սահմանադրությունը հանրաքվեով անցկացնել։ Տասնյակ, հարյուրավոր մարդկանց կկալանավորեն, էլի նույն գործընթացով կանցնենք, բայց սա բոլորիս՝ մեր ժողովրդի համար է։ Ալիևը կարո՞ղ է լավ բան առաջարկել հայերի համար։ Պարզ է, որ այնպիսի Սահմանադրություն է դեմ տալու, որ թուլանանք։ Մենք ենք դրա պատը, մենք ենք կրում այս բոլոր ազդեցությունները և կրում ենք մեր ժողովրդի համար»։
Կարապետյանի խոսքով՝ անկախության կորստի առաջին ցուցիչն այն է, երբ հարևանի պահանջով փոխում ես Սահմանադրությունը և հանում Անկախության հռչակագիրը.
«Պատկերացրեք՝ չունենանք ձեր ծննդականը։ Հանում են երկրի ծննդականը՝ երբ է ստեղծվել, ինչ գաղափարների շուրջ է ստեղծվել։ Սա անկախության համար պայքար է, անկախություն մեր հարևան թշնամուց»։
Արփինե ՍԻՄՈՆՅԱՆ
