«Որեւէ բանն իրականության հետ ընդհանրապես կապ չունի»,- Aravot.am-ի հետ զրույցում ասաց «Ժառանգություն» խմբակցության քարտուղար Թեւան Պողոսյանը, որը դեկտեմբերի 28-ին ԱԺ նախագահին դիմում էր ներկայացրել` պատգամավորական մանդատից հրաժարվելու մասին: Թեւան Պողոսյանը չէր մանրամասնել իր հրաժարականի պատճառները`միայն նկատելով, որ դրանք անձնական բնույթի են:
Այդ ընթացքում ամենատարբեր հրապարակումներ ու մեկնաբանություններ եղան այն մասին, որ Թեւան Պողոսյանին վախեցրել են, այլ պաշտոն են տալու կամ խմբակցության ղեկավար Զարուհի Փոստանջյանի հետ են կապված թե նրա, թե Ռուբիկ Հակոբյանի հրաժարականները:
Հիշեցնենք, ավելի վաղ Ռուբիկ Հակոբյանն էր հրաժարվել խմբակցության ղեկավարի պաշտոնից`դարձյալ չմանրամասնելով պատճառները եւ անցած նստաշրջանի ողջ ընթացքում Ռուբիկ Հակոբյանի գործունեությունը «Ժառանգության» շրջանակներում բավականին պասիվ էր:
Երկու օր առաջ Թեւան Պողոսյանը երկրորդ ֆեյսբուքյան գրառումը կատարեց`տեղեկացնելով, որ ետ է վերցնում մանդատից հրաժարվելու իր դիմումը:
Կարդացեք նաև
Նույնիսկ այսօր Թեւան Պողոսյանը չի ցանկանում խոսել իր հայտարարությունների մասին: «Իմ որոշումներն իմ անձնական խնդիրների դաշտում են եղել, քանի որ քաղաքականության հետ ընդհանրապես կապ չունի`ոչ էլ ցանկություն ունեմ հանրային քննարկման առարկա դարձնել»,- ասաց նա:
Մեր զրուցակիցը ժպիտով արձագանքեց հարցին`Րաֆֆի Հովհաննիսյանին հաջողվե՞ց Ձեզ համոզել:
Մեր դիտարկմանը`պատճառներն այդպես էլ գաղտնի՞ կմնան, Թեւան Պողոսյանն ասաց. «Դե, եթե անձնական են, գոնե իմ մեջ կմնան»:
Նելլի ԳՐԻԳՈՐՅԱՆ
