Ուկրաինայի պաշտոնանկ արված նախագահ Վիկտոր Յանուկովիչը հայտարարություն է արել, որտեղ նշել է, որ դեռևս իրեն համարում է Ուկրաինայի օրինական ընտրված նախագահ: Փոխանցում է ուկրաինական «Ինտերֆաքս»-ը:
«Ես՝ Վիկտոր Ֆյոդորի Յանուկովիչը, դիմում եմ ուկրաինացի ժողովրդին: Ես ինձ շարունակում եմ համարել Ուկրաինայի օրինական ղեկավարը՝ ընտրված Ուկրաինայի քաղաքացիների ազատ կամքով», – ասված է հայտարարության մեջ, որը գործակալությանն է ուղարկվել հինգշաբթի օրը:
Անդրադառնալով Գերագույն Ռադային՝ նա պնդել է, որ վերջին շրջանում ընդունված որոշումները լեգիտիմ չեն, քանի որ նիստերն անցնում են «Տարածաշրջանների կուսակցության» և այլ խմբակցությունների պատգամավորների բացակայությամբ, որոնք իրենց կյանքի համար վախենալով՝ չեն ներկայանում, իսկ ոմանց, ըստ նրա, ֆիզիկական բռնությունների են ենթարկել ու ստիպել, որ լքեն երկիրը:
Յանուկովիչը հիշատակել է նաև ընդդիմության հետ ստորագրած ճգնաժամը կարգավորելու համաձայնագիրը ու նշել, որ այն կատարված չէ.
Կարդացեք նաև
«Համարում եմ, որ 2014թ. փետրվարի 21-ին արևմտյան հարգարժան գործընկերների ներկայությամբ իմ և Ուկրաինայի ընդդիմության առաջնորդների միջև ստորագրված Ուկրաինայի ճգնաժամը կարգավորելու համաձայնագիրը կատարված չէ», – ասել է նա՝ հիմնավորելով, որ փողոցները շարունակում են ծայրահեղականները տնօրինել, – «պաշտոնապես հայտարարում եմ, որ պատրաստ եմ մինչև վերջ պայքարել, որպեսզի կատարվի Ուկրաինային քաղաքական խորը ճգնաժամից դուրս բերելու պայմանավորվածությունները»:
Ուկրաինայի 4-րդ նախագահ Վիկտոր Յանուկովիչի դեմ քրեական գործ է հարուցված, նա գտնվում է հետախուզման մեջ:
Պատրաստեց Հովհաննես ԻՇԽԱՆՅԱՆԸ
