Ուկրաինայում տեղի ունեցած զարգացումներից հետո նոր աշխարհաքաղական իրավիճակ է հաստատվել: Քաղաքական վերադասավորումները նոր տեսք ստացան նաև այն բանից հետո, երբ Ղրիմը ցանկություն հայտնեց միանալ Ռուսաստանին:
Այս պարագայում ի՞նչ իրավիճակում է հայտնվել Հայաստանը, ի՞նչ հնարավոր մարտահրավերների առաջ է կանգնած մեր երկիրը՝ հատկապես հաշվի առնելով այն, որ ղարաբաղյան հակամարտությունը դեռ լուծված չէ:
«Մոդուս վիվենդի» կենտրոնի ղեկավար Արա Պապյանը մտահոգություններ ունի, որ «Ռուսաստանի կողմից Հայաստանի վրա ճնշում կլինի Ղրիմը ճանաչելու հորդորով»: Արա Պապյանը չի բացառում նաև այս սցենարը. «Եթե Ռուսաստանը մեզ առաջարկի մի սիմվոլիկ բատալյոն ուղարկել Ղրիմ, ի՞նչ պետք է մենք անենք»: Քաղաքագետը նկատում է, որ Ուկրաինայում տեղի ունեցած զարգացումներից հետո Ռուսաստանն այժմ ավելի թուլացած է, ինչի պատճառները Ռուսաստանի՝ ռազմավարական սխալների մեջ են. «Ես Ռուսաստանի համար լուսավոր ապագա չեմ կանխատեսում: Ռուսաստանը ռազմավարական սխալ քայլ արեց, փորձեց հակադրվել արևմուտքին, բայց ուժերն ակնհայտորեն անհավասար են: Ռուսաստանի վարած նման քաղաքականության արդյունքում Եվրոպան իրեն ավելի ու ավելի մերձավոր ու ենթարկվող է զգում ԱՄՆ-ին, ինչը մեզ համար ցանկալի չէ»:
Aravot.am-ի հարցին՝ Հայաստանը կրկի՞ն ճնշման կենթարկվի Ռուսաստանի կողմից՝ այս անգամ արդեն Ղրիմի անկախության ճանաչման պարտադրանքի տեսքով: Քաղաքագետ Հրանտ Մելիք-Շահնազարյանը պատասխանեց. «Նման բան չի լինելու: Չնայած ՌԴ-ն շահագրգռված էր, որ հնարավորինս շատ պետություններ ճանաչեին Աբխազիայի և Օսեթիայի անկախությունը, բայց նման բան չեղավ: Եթե անգամ եղել է այդ ճնշումը, ապա, միևնույն է, ՀՀ-ի հանդեպ չի եղել, Հայաստանը առաջնորդվել է իր սեփական շահերով: Որպես այդպիսին՝ Ղրիմի անկախության խնդիր դրված չէ: Ղրիմի միտումներն ու ձգտումներն այլ է.Ղրիմը փորձում է դառնալ Ռուսաստանի մաս կազմող քաղաքական սուբյեկտ: Ուստի պետք է նման ճնշումներ սպասելուն տրամադրված լինել, որ նման բան սպասել»:
Կարդացեք նաև
Մեր դիտարկմանը, գուցե ՌԴ-ն օգտագործի ղարաբաղյան հակամարտությո՞ւնը նման ճնշումների գնալու համար, պարոն Մելիք-Շահնազարյանը պատասխանեց. «Եթե անգամ տեսականորեն նման բան լիներ, եթե Ռուսաստանը միտված լիներ նման քայլի գնալու ու եթե Աբխազիայի և Օսեթիայի դեպքում դա չարեցին, ապա Ղրիմի պարագայում որևէ բան չի փոփոխվել, նույն արդյունքներն ենք ունենալու»: Քաղաքագետի կարծիքով՝ ՀՀ-ի ներկայիս չեզոքությունը լավագույն տարբերակն է և «նախագահ Սարգսյանի կողմից Դուբլինում ներկայացված դիտարկումները Հայաստանին շահական իրավիճակում են դնում»:
Տաթև ՀԱՐՈՒԹՅՈՒՆՅԱՆ
