Երեւանի 33-րդ թաղամասի բնակիչներն այսօր կառավարության շենքի դիմաց «վարչապետ իջիր ներքեւ» գոռալով բողոքում էին, որ ՀՀ նախագահը, վարչապետն ու ԱԺ նախագահը իրենց խաբել են:
Ցուցարարները պահանջում էին կառավարությունից իրենց տները, որոնք տարիներ առաջ կառավարության որոշմամբ ճանաչվել են գերակա շահ, իսկ կառավարության խոստացած փոխհատուցումը չկա ու չկա:
Բնակիչների պատմելով, նրանցից ոմանք արդեն՝ 7 , իսկ ուրիշները 5 տարի է վարձով բնակարաններում են ապրում, բնակարանների վարձերն էլ արդեն երկու ամիս չեն վճարել, իսկ բնակարանների տերերն եկել ու ասում են` չեք վճարում, հեռացեք:
Կարդացեք նաև
«Հետ տվեք մեր տները»,- գոռում էին բնակիչները, իսկ տարեց մի բնակիչ վրդովվել էր վարչապետի անտարբերությունից. «5 տեղակալ, խորհրդական ու օգնական ունի, բայց գործ չի անում, ի՞նչ է արել, ինչի՞ դուրս չի գալիս ու պատասխան տա: Չեն լսում, չեն օգնում, խաբել են »:
Արփինե ՍԻՄՈՆՅԱՆ
