Այսօր ԱԺ նիստի սկզբում ԲՀԿ խմբակցության պատգամավոր Էլինար Վարդանյանը հորդորել էր իշխանությանն` ուշադիր լինել նախարարների պահվածքի նկատմամբ՝ նկատի ունենալով բնապահպանության նախարար Արամ Հարությունյանի արտահայտությունը՝ ակտիվիստին. «Ականջներդ կկտրեմ, կտամ ձեռքդ, լակոտ»:
ԲՀԿ պատգամավորի հորդորին արձագանքեց ԿԳ նախարար Արմեն Աշոտյանը, ասելով, որ իրեն դուր չի գալիս քաղաքական գործիչների՝ վերջին շրջանում օգտագործվող բառապաշարը. «Եթե վերլուծություն անենք ու տեսնենք, թե վերջին 1 տարվա ընթացքում իրար մասին ինչ բառերով են խոսում եւ ով է սկսում առաջինը խոսել… Այո, կարող եք այստեղ նստել, ոչինչ չասել, հետո գնալ ֆեյքերով, կեղծ սայթերով ինչ ասես գրեք: Փոքր երկիր է, եւ բոլորս գիտենք՝ ով ում մասին ինչ է գրում: Բառերի մեջ չափավոր եղեք: Սիրելի ընդդիմախոսներ, հարգելի գործընկերներ, ձեւը գտել եք, այստեղ մի քիչ ավելի կոռեկտ եք, մի քիչ, որովհետեւ երբեմն չափն անցնում եք նաեւ այստեղ, իսկ մամուլում կատաստրոֆա է, ճգնաժամ»: Արմեն Աշոտյանը չթվարկեց այն կայքերը, որտեղ վատ բառապաշար է օգտագործվում: Հովիկ Աբրահամյանը խոստացավ ավելացնել պարոն Աշոտյանի ելույթի ժամանակը՝ նրան հնարավորություն ընձեռելու, որպեսզի, այնուամենայնիվ, թվարկի այդ կայքերը:
ԿԳ նախարարը նպատակահարմար չգտավ նիստին հետեւող աշակերտների մոտ թվարկել նման կայքերը՝ ասելով, որ նրանք կգնան ու կսկսեն փնտրել համացանցում նման «վատ կայքերը»:
Հռիփսիմե ՋԵԲԵՋՅԱՆ
Կարդացեք նաև
