«Դեմ եմ» քաղաքացիական նախաձեռնության անդամները վաղը ժամը 12-00-ին, բողոքի ակցիա են նախատեսել Ֆինանսների նախարարության շենքի դիմաց:
Նրանք իրենց ակցիան նախարարության առջեւից կսկսեն ու կշարունակեն Պետեկամուտների կոմիտեի շենքի դիմաց։ Այսօր «Փիփլմեթր» ակումբում «ԴԵՄ ԵՄ»-ի անդամ Մանուկ Զաքարյանը հստակեցրեց նաեւ իրենց պահանջները. «Հիմնվելով ՍԴ որոշման 6-րդ կետի երկրորդ մասի վրա` ֆինանսների նախարարությունից պահանջում ենք անհապաղ համապատասխան հրահանգավորմամբ ՊԵԿ-ի հաշվետվության ձեւանմուշներից անհապաղ դուրս բերել պարտադրանք թելադրող տեխնիկական մեքենայությունները, որոնցով գործատուներին հարկադրում են անկախ թե գործատուի, թե աշխատակցի կամքից պարտադիր կուտակային փոխանցումների մասով հաշվետու լինել»:
Նրա խոսքով, իրենք ամեն ինչ անելու են, որ պարտադիր պահումները չկատարած գործատուները չենթարկվեն տույժերի: Նա նաեւ ասաց, որ իրենք վաղը վերջնաժամկետ են տալու ֆինանսների նախարարությանը եւ իրենց պահանջի լուծման համար հստակ ժամկետ են պահանջելու:
Նախաձեռնության անդամ Վահան Դուրինյանն էլ նկատեց, որ իրենց պահանջած տեխնիկական շտկումների համար մի ժամն էլ բավարար է:
Կարդացեք նաև
Նախաձեռնության անդամներից Դավիթ Դավթյանն ասաց, որ իրենք մտադիր են դիմում-նամակներ փոխանցել Ֆինանսների նախարարություն` պահանջելով, որ էլեկտրոնային հաշվետվությունների ձևը խմբագրելի դառնա և այն քաղաքացիները, որոնք չեն ցանկանում, որ իրենց աշխատավարձերից պահումներ արվեն, նրանց անվան դիմաց «0» դրվի, և սա ևս չդառնա գործատուի և աշխատակցի միջև վեճի առարկա:
Արփինե ՍԻՄՈՆՅԱՆ
