Այսօր Ազատության հրապարակում մի խումբ ազատամարտիկներ կրկին հավաքվել էին` ի պաշտպանություն իրենց մարտական ընկերոջ` Վոլոդյա Ավետիսյանի:
Նրանք նախքան Բաղրամյան 26 գնալը, հրապարակում կրկին հիշեցին «կեղծ» ազատամարտիկներին:
Մասնավորապես մտաբերեցին ԱԺ ՀՀԿ խմբակցության պատգամավոր Սամվել Ալեքսանյանին:
«Հայտնեցին, թե 92-93թթ. նա Շահումյանում է կռվել, բայց այդ տարիներին Շահումյանում արդեն զորք չկար: Երեւի 1997-ին`Կիրովաբադում, 98-ին էլ Բաքվում է եղել, մարտական ուղին թող ճշտի»,- ասաց ազատամարտիկ Գագիկ Սարուխանյանը: Ազատամարտիկ Ռեմբոն էլ հեգնեց` Սամվել Ալեքսանյանը Կիրովաբադի գրավմանն է մասնակցել:
Կարդացեք նաև
Ավելի ուշ ազատամարտիկները շարժվեցին նախագահական նստավայր` պահանջելու շաբաթներ առաջ նախագահին հանձնած իրենց նամակի պատասխանը:
Հիշեցնենք, որ ազատամարտիկները նամակով պահանջել էին անհապաղ ազատ արձակել անազատության մեջ գտնվող Վոլոդյա Ավետիսյանին եւ ստիպել ՊՆ քննչական մարմնին գործել Սահմանադրությամբ:
Նախագահական նստավայրի նամակների ընդունման բաժնի 2 աշխատակից ազատամարտիկներին փոխանցեցին, որ նախագահը չի կարող միջամտել Վոլոդյա Ավետիսյանի գործին, քանի դեռ այն գտնվում է դատաքննության փուլում:
Ազատամարտիկներին այդ պատասխանը չգոհացրեց:
«Մենք չէինք դիմում նախագահին, որ միջամտեր դատարանի աշխատանքին, դիմում էինք, որ նախագահը հետ վերադարձնի թե’ դատարանի, թե’ իրավապահ մարմինների աշխատանքը իրավական դաշտ, քանի որ նա է Սահմանադրության երաշխիքը»,- մեզ հետ զրույցում ասաց Գագիկ Սարուխանյանը:
Մեր հարցին` ակնկալիքներ ունեի՞ք ՀՀ նախագահից, կարծում էիք կմիջամտի՞, ասաց. «Չէ, բացարձակ: Ակնկալիքներ չունենք: Քաղաքացիական ակցիա է, անում ենք, որ մեզ հանգիստ զգանք, որ արել ենք բոլոր հավանական եւ անհավանական բաները… այս նամակով չէինք դիմում նախագահին, թե Վոլոդյա Ավետիսյանի գործն է միայն անօրինական, բաց թողեք: Ոչ ստիպում էինք նրան, որ գործի օրենքի շրջանակներում եւ ստիպի բոլոր ատյաններին աշխատել իրավական դաշտում: Եվ չէինք ակնկալում, որ հենց այս գործով Սերժ Սարգսյանը օրինական գործողությունների դիմեր: Սերժ Սարգսյանի ստեղծած բեսպրեդելի հիերարխիան չէ՞»:
Արփինե ՍԻՄՈՆՅԱՆ
