Այսօր խորհրդարանում, 2013 թվականի բյուջեի կատարողականի քննարկումների ժամանակ բավականին զավեշտալի իրավիճակ ստեղծվեց: Այն նիստում, երբ պետք է բյուջեի կատարողականի հաշվետվություն ներկայացնեին մարզպետները, նաեւ բավական շատ պատգամավորներ էին մասնակցում: Արդյունքում, Կոտայքի նորանշանակ մարզպետ, բնապահպանության նախկին նախարար Արամ Հարությունյանն, որը դահլիճ մտավ վերջին պահին՝ մնաց ոտքի վրա: Կառավարության ներկայացուցիչների եւ պատգամավորների համար նախատեսված տեղերում ազատ տեղ չկար:
Արամ Հարությունյանը բարձրաձայն իր դժգոհությունը հայտնեց, որ «մարզպետների համար տեղ չկա», այդ պահին նստած տեղից վեր կացավ Վայոց ձորի մարզպետ Էդգար Ղազարյանը`իր տեղը զիջելու համար գործընկերոջը: «Չէ, չէ, նստի, լավ ա, ես ուրիշ տեղ կնստեմ»,- գործընկերոջ մեծահոգությանը պատասխանեց Արամ Հարությունյանը եւ համալրեց լրագրողների շարքերը:
Նելլի ԳՐԻԳՈՐՅԱՆ
