2013թ. մայիսի 15-ին Նոյեմբերյանի զորամասում Լյուքս Ստեփանյանի սպանության գործով դատավարության մայիսի 30-ի նիստում ճառով պետք է հանդես գար պաշտպանական կողմը: Ամբաստանյալ Դավիթ Խաչատրյանի 2 պաշտպաններից նիստին ներկայացել էր միայն Վաղինակ Գեւորգյանը:
Դավիթ Խաչատրյանը դատարանի դահլիճ մտավ փորը բռնած: Վաղինակ Գեւորգյանն ասաց, որ իր պաշտպանյալի առողջական վիճակը վատ է, որի պատճառով դատական նիստը չի կարող կայանալ:
Պաշտպանն ասաց, որ դատարանը պետք է դիմի քրեակատարողական հիմնարկին, քրեակատարողական հիմնարկների վարչությանը եւ համապատասխան ծառայություններին եւ պահանջի այն փաստաթղթերը, որոնք կապված են Դավիթ Խաչատրյանի առողջության հետ:
Գեւորգյանը հայտնեց, որ մեկուսարանից Տավուշի մարզի առաջին ատյանի դատարան բերելիս ոստիկանները Դ. Խաչատրյանին տեղափոխել են Իջեւանի հիվանդանոց, դատական նիստից 5 րոպե առաջ Խաչատրյանին ներարկում են կատարել, որպեսզի կարողանա դիմանալ: Պաշտպանը հարցրեց` «այս անմարդկային վերաբերմունքը ի՞նչ նպատակ է հետապնդում»:
Կարդացեք նաև
Դատավոր Զոյա Զաքինյանն ասաց, որ Խաչատրյանի խնդրանքով բժիշկներ են եկել, որոնք ներարկում են կատարել: Պաշտպան Վ. Գեւորգյանը հայտարարեց, որ առողջ մարդուն չեն ներարկում, որ Դ. Խաչատրյանը 5 օր առաջ է դուրս եկել հացադուլից, քրեակատարողական հիմնարկը, ոստիկանությունը, դատարանն անուշադրության են մատնում Դ. Խաչատրյանի առողջական վիճակը:
Դատավոր Զոյա Զաքինյանը որոշեց ամբաստանյալի առողջական վիճակի պատճառով հետաձգել նիստը: Պաշտպան Գեւորգյանը դատարանին խնդրեց նիստը ողջամիտ ժամկետով՝ առնվազն 10 օրով հետաձգել, որպեսզի պետական համապատասխան մարմինները Դ. Խաչատրյանի առողջության վերաբերյալ փաստաթղթեր տրամադրեն: Դատավորը հաջորդ նիստը նշանակեց հունիսի 24-ին:
Վեճ բորբոքվեց Լյուքսի մոր` Լուիզա Ստեփանյանի եւ պաշտպան Գեւորգյանի, Գեւորգյանի եւ Լյուքս Ստեփանյանի հարազատների, համագյուղացիների միջեւ: Լուիզա Ստեփանյանը պաշտպանին ասաց, որ պաշտպաններն են Դավիթ Խաչատրյանին սովորեցրել կարել բերանը, պաշտպանն էլ հակադարձեց. «Բերանը կկարի, չի կարի, ձեր ի՞նչ գործն է»:
Դատական կարգադրիչները նիստի ավարտից հետո դուրս հրավիրեցին Լյուքս Ստեփանյանի համագյուղացիներին, սակայն վերջիններս չէին հանդարտվում, բորբոքված խոսում էին դատարանի միջանցքում եւ շենքի առաջ:
Նիստի մանրամասներն՝ ավելի ուշ, տեսանյութում
Ոսկան ՍԱՐԳՍՅԱՆ
