Օրերս հաշմանդամություն ունեցող վանաձորցի մի քանի երեխաների ծնողներ «Սեյվ դը չիլդրեն» կազմակերպության Life ծրագրի շրջանակներում «Օրրան» բարեգործական հասարակական կազմակերպության Վանաձորի մասնաճյուղում հանդիպում ունեցան «Մասնագիտական կողմնորոշման մեթոդական կենտրոն»-ի մասնագետների հետ:
Վերջիններս «Մասնագիտական կողմնորոշում և կարիերայի ուղղորդում» թեմայով սեմինարի ընթացքում խոսեցին հաշմանդամություն ունեցող երեխաների խնդիրներից, ինչպես նաեւ ծնողների հետ քննարկեցին այն հարցը, թե ինչպես երեխաներին ուղղորդեն մասնագիտություն ընտրելիս:
«Այս ծրագիրը հաշմանդամություն ունեցող 18-ից բարձր մարդկանց է վերաբերում: Մենք մինչեւ հիմա բազմաթիվ գործողություններ ենք իրականացրել հաշմանդամություն ունեցող անձանց հետ, նրանց մասնագիտական կողմնորոշման ուղղությամբ ենք աշխատել, եւ բավականին վերապատրաստումներ ենք արել: Մենք աշխատում ենք նաեւ այն դպրոցների հետ, որտեղ իրականացվում է ներառական կրթություն, ծրագրի նպատակն է աշխատանք թե ծնողների եւ թե երեխաների հետ»,-լրագրողների հետ զրույցում ասաց Life ծրագրի պատասխանատու, հոգեբան Սոֆիկ Մինասյանը:
Կարդացեք նաև
Նա նկատեց, որ հաշմանդամություն ունեցող երեխաները հաճախ տնից դուրս չեն բերվում, նրանց հետ հաճախ սխալ են վերաբերվում, ինչը, ըստ նրա, բռնություն է երեխաների հանդեպ:
«Շատ հաճախ երեխաները չեն մասնակցում այն միջոցառումներին, որտեղ կարող են մասնակցել: Մենք հասկացանք, որ այս դեպքում շատ կարեւոր է ծնողների դերը, այսինքն` եթե ծնողները ճիշտ իրազեկված լինեն իրենց երեխաների մասին, նրանք անպայման կմասնակցեն բոլոր այն միջոցառումներին, որոնք վերաբերում են ներառական կրթությամբ երեխաներին»,-նշեց Սոֆիկ Մինասյանը:
Նա տեղեկացրեց, որ ծրագրի շրջանակներում ստեղծվել են մասնագիտական եւ ծնողական խորհուրդներ:
«Աշխատելու ենք թե ծնողների, թե երեխաների հետ»:
Life ծրագիրն իրականացվում է ԱՄՆ Միջազգային զարգացման գործակալության ֆինանսավորմամբ:
Ծրագրի գործընկերներն են «Ակտիվիա» միջազգային հիմնադրամը, «Ունիսոն» հ/կ-ն, «Էյջ-Դի-Փի» հիմնադրամը եւ «Լիարժեք կյանք» հ/կ-ն:
Անուշ ԲՈՒԼՂԱԴԱՐՅԱՆ
