Սերժ Սարգսյանի Թբիլիսի կատարած վերջին այցի ժամանակ Հայաստանի և Վրաստանի միջև պետական գաղտնի տեղեկություններ փոխանակելու գաղտնի համաձայնություն է ձեռք բերվել, պնդում է վրացի լրագրող Գիորգի Կալատոզիշվիլին «Վեստնիկ Կավկազա» լրատվականում:
Ըստ լրագրողի, այդ համաձայնությունը խիստ քննադատության է արժանացել Վրաստանի ընդդիմության շրջանակներում, այն հիմնավորմամբ, որ Հայաստանի միջոցով ռազմական գաղտնի տեղեկությունները կարող են փոխանցվել Ռուսաստանին:
Մշակույթի նախկին նախարար Նիկա Ռուրուան մտահոգություն է հայտնել, որ այդ փաստաթուղթը Վրաստանի առջև կարող է «փակել ՆԱՏՕ-ի դռները»:
Թբիլիսիի դիվանագիտական ակադեմիայի ռեկտոր Իոսիֆ Ծինծաձեն նշել է, որ հստակ չէ, թե ինչ գաղտնի տեղեկությունների մասին է խոսքը, քանի որ տեղեկատվության գաղտնիության մի քանի մակարդակ կա: Նա նաև հայտնել է, որ չի հասկանում այդ համաձայնության անհրաժեշտությունը՝ անվանելով այն «նոնսենս», գրում է Կալատոզիշվիլին:
Կարդացեք նաև
Կառավարության ռազմավարական ինստիտուտի ղեկավար Պետրե Մամրաձեն հայտնել է, որ Վրաստանի համար ՆԱՏՕ-ի դռները փակվել են այն բանից հետո, երբ նախկին նախագահ Միխեիլ Սահակաշվիլին 2008թ. օգոստոին ռազմական գործողություններ է սկսել:
Հայաստանի նախագահ Սերժ Սարգսյանը պաշտոնական այցով Վրաստան էր մեկնել հունիսի 18-ից 19-ը:
Պատրաստեց Հովհաննես ԻՇԽԱՆՅԱՆԸ
