Մայիսի 24-ին Վրաստանի Թեքալի գյուղում կայացած «Հարավկովկասյան միություն, կողմ եւ դեմ: Վրաստանի դերն ու ներուժը» թեմայով հասարակական լսումների ժամանակ ադրբեջանցի քաղաքագետ Զարդուշտ Ալիզադեին հարցեցինք, թե Հայաստանի բնակիչների հետ նման հանդիպումներից հետո Ադրբեջանում իր վրա ճնշում չի՞ լինում:
Նա ասաց. «Պետության կողմից՝ բացարձակապես ոչ մի ճնշում: Բանն այն է, որ նման հանդիպումներին մասնակցելուց հետո ես հոդվածներ եմ գրում, ներկայացնում եմ իմ տպավորությունները եւ այլն: Ես ոչ մի փակ, թաքցրած բան չունեմ: Քաղաքացիական հասարակության կողմից(ես նրանց պայմանականորեն եմ անվանում քաղաքացիական հասարակություն, որովհետեւ նրանց քսի են տալիս, նրանց պահում են) ինչ-որ մարդիկ սկսում են գռմռալ, չփչփացնել: Ռաուֆ Միրկադիրովի ձերբակալությունից հետո Ակիֆ Նաղին (այսպես կոչված «Ղարաբաղի ազատագրության կազմակերպության» ղեկավար,ծանոթ. Ո. Ս.-ի) հայտարարեց, թե ինչու՞ չեն ձերբակալում Զարդուշտ Ալիզադեին, Արզու Աբդուլաեւային, Սեյմուր Բայջանին եւ ուրիշների: Ինձ զանգահարեցին եւ հարցրին, թե ինչ եմ մտածում այդ մասին: Ես ասացի, որ ոչինչ էլ չեմ մտածում, թող Ալլահը նրան օգնի իր հացը վաստակելու: Ասացին, թե այնուամենայնիվ ի՞նչ եմ կարծում: Ասվածին կարող եմ մի արտահայտություն ավելացնել: Պարսկական իմաստուն ասացվածք կա՝ «Հիմարի պատասխանը լռությունն է»:
Ոսկան ՍԱՐԳՍՅԱՆ
Կարդացեք նաև
