Բրազիլիայի հավաքականի մարզման ժամանակ նոր արտակարգ դեպք է պատահել: Խաղային դրվագներից մեկում մեջքը ցավեցրել է Վիլիանը, որն ի վիճակի չի եղել շարունակել պարապմունքը: Ճիշտ է, բժիշկներն անմիջապես շտապել են օգնություն ցույց տալ «Չելսիի» խաղացողին, սակայն թե որքա՞ն լուրջ է վնասվածքը, առայժմ ոչինչ հայտնի չէ:
Եթե աշխարհի հնգակի չեմպիոնը կիսաեզրափակչից առաջ նրան էլ կորցնի, ապա գլխավոր մարզիչ Լուիշ Ֆելիպե Սկոլարին եւ նրա թիմը Գերմանիայի հետ խաղում լուրջ խնդիրների առջեւ կկանգնեն: Քիչ էր, որ նախորդ խաղում ողի կոտրվածքի պատճառով մինչեւ աշխարհի առաջնության ավարտը շարքից դուրս եկավ Նեյմարը, հիմա էլ խնդիրներ են առաջանում նրա թիվ մեկ փոխարինող, հարձակողական ոճի կիսապաշտպան Վիլիանի հետ: Այնպես որ, բացառված չէ, որ Բրազիլաին կիսաեզրափակչում հանդես գա առանց առանցքային երեք ֆուտբոլիստների՝ Նեյմարի, Վիլիանի եւ Տյագո Սիլվայի, որն էլ երկու դեղին քարտի պատճառով չի կարող մասնակցել կիսաեզրափակչին:
Լրատվամիջոցները գրում են նաեւ, որ եթե Վիլիանի վնասվածքն իսկապես լուրջ լինի, դա կանդրադառնա նաեւ Լոնդոնի «Չելսիի» վրա, որի սեփականատերը ռուս միլիարդատեր Ռոման Աբրամովիչն է: Վիլիանը այդ դեպքում հարկադրված կլինի բաց թողնել Անգլիայի առաջնության մի հատվածը, մինչդեռ, «Չելսին» Ժոզե Մոուրինիոյի գլխավորությամբ լուրջ խնդիրներ ունի լուծելու նոր մրցաաշրջանում:
Աշոտ ՀԱԿՈԲՅԱՆ
Կարդացեք նաև
Լուսանկարը՝ AFP-ի
