Մխիթար Հերացու անվան բժշկական համալսարանի ֆարմակոլոգիայի ամբիոնի վարիչ Արմեն Մանուկյանի եւ համալսարանի միջեւ կնքվել է աշխատանքային պայմանագիր: Պայմանագիրը, սակայն, դադարեցվել է, գործել այն բանից հետո, երբ ուսանողի եւ դասախոսի միջեււ վեճ է եղել: Դասախոսը դիմել է դատարան, վերականգնվել է աշխատանքում, սակայն բողոքներն այս անգամ վճռի կատարմանն են վերաբերում:
Աշխատանքային պայմանագրի համաձայն՝ Արմեն Մանուկյանը նշանակվել էր համալսարանի ֆարմակոլոգիայի ամբիոնի վարիչի պաշտոնակատար: Ռեկտորի հրամանով կողմերի միջեւ եղած աշխատանքային պայմանագիրը երկարաձգվել էր եւ ուժի մեջ էր լինելու մինչեւ 2012 թվականի փետրվարը: Ըստ Արմեն Մանուկյանի, 2011թ. հոկտեմբերի 14-15-ին ստոմատոլոգիական ֆակուլտետի ուսանող Հ. Բաբլոյանին ոչ հարիր պահվածք դրսեւորելու համար լսարանից դուրս էր հրավիրել: Ինչպես տեղեկացրել ենք, ուսանողը, ըստ դատարանում առկա փաստաթղթերի, փայտով մուտք էր գործել լսարան եւ դասախոսին ուսանողների ներկայությամբ «արա» ասելով՝ դուրս էր հրավիրել հաշիվներ պարզելու:
Ռեկտորն աշխատանքից ազատել էր դասախոսին, իսկ նա էլ հաղթել էր Կենտրոն եւ Նորք-Մարաշ վարչական շրջանների ընդհանուր իրավասության դատարանում: Հուլիսի 10-ին քաղաքացիական վերաքննիչ դատարանը՝ Ստեփան Միքայելյանի նախագահությամբ, դատավորներ Ա. Նազարյանի եւ Ա. Պետրոսյանի մասնակցությամբ, հրապարակեց կատարողական թերթիկը պարզաբանելու հարցի հետ կապված դասախոսի բերած բողոքի հիման վրա կայացված որոշումը: Դասախոսի բողոքը մերժվել էր:
Բժշկական համալսարանի ներկայացուցիչն էր Մելիք Սողոմոնյանը: Հիշեցնենք, որ նա հայտնել էր, որ մայիսի 21-ին Արմեն Մանուկյանը նշանակվել է համալսարանի հետբուհական կրթության ֆարմակոլոգիայի ամբիոնի վարիչի պաշտոնակատար, կատարվել է հաշվարկ՝ հարկադիր պարապուրդի գումարները վճարելու համար: Արմեն Մանուկյանն ազատման օրվա դրությամբ ստացել է 264. 038 դրամ աշխատավարձ, մինչդեռ, մայիսի 21-ին վերստին վերականգնվելով իր աշխատանքում, նրա համար սահմանվել է 279.200 դրամ աշխատավարձ:
ՌՈՒԶԱՆ ՄԻՆԱՍՅԱՆ
Կարդացեք նաև
«Առավոտ» օրաթերթ
15.07.2014
