70-ական թվականներին այն թաղամասում, որտեղ ես ապրում էի` Լենինգրադյան եւ Հալաբյան փողոցների անկյունում, միջին տարիքի մի կին կվաս էր վաճառում: Օրերից մի օր այդ կինը (չգիտեմ ինչու` ռուսերեն) որոշել էր ազդարարել, որ տակառում կվաս չկա, եւ հայտարարություն էր փակցրել` «квас нет»: Ես՝ 4-րդ թե 5-րդ դասարանի աշակերտս, նրան հուշեցի, թե ռուսերենի քերականական կանոնները պահանջում են «կվասի» վերջում ավելացնել «ա» տառը: Չնայած իմ չափազանց պատանի տարիքին՝ կինը ինձ լսեց: Հաջորդ օրը տակառում կվաս կար, եւ վաճառողը շտապում էր ուրախացնել հաճախորդներին` «кваса есть»:
Քաղաքականության մեջ նույնպես, ինչպես եւ քերականական կանոններում, առկայության եւ բացակայության դեպքում կիրառվում են տարբեր «հոլովներ»: Մասնավորապես՝ ընդդիմադիր որոշ կուսակցությունների համակրանքների եւ հակակրանքների դեպքում: Մի դեպքում իշխանական կոալիցիայում լինելը վարկաբեկիչ չէ, ամբողջ կյանքի համար խարան չէ, հակառակը` վկայում է երկիրը փրկելու անհույս, բայց հերոսական փորձերի մասին: Մեկ այլ դեպքում նույն իշխանական կոալիցիայի անդամ հանդիսանալն աներկբայորեն ապացուցում է «անսկզբունքային» եւ «ծախված» լինելը:
Մի դեպքում կիրառվում է «ռեալպոլիտիկի» սկզբունքը` «կմիավորվենք թեկուզ սատանայի հետ, միայն թե հասնենք մեր նպատակին», «չկան հավերժ թշնամիներ եւ հավերժ բարեկամներ»: Մեկ այլ դեպքում կիրառվում են «բարոյական բարձր չափանիշներ», եւ թշնամիները միանգամայն «հավերժական» են դառնում: Առաջ երկրորդ նախագահը մարմնավորում էր մարդկության բոլոր մեղքերը, հիմա պարզվում է, որ «նրա ժամանակ երկիրը զարգանում էր» (եթե «երկիր» ասելով հասկանում ենք քրեաօլիգարխիկ համակարգը, ապա դա միանգամայն ճիշտ է):
… «Օրինաց երկիր» կուսակցությունն այսօր հանրահավաք է կազմակերպում: Թեման կարծես թե հրատապ է՝ էլեկտրաէներգիայի թանկացումը: Հանրային ծառայությունները կարգավորող հանձնաժողովի թողտվությամբ էլցանցերի սեփականատեր «Ինտերռաո» ռուսաստանյան կազմակերպությունն իրականացնում է չափազանց վատ մենեջմենթ, խրվել է պարտքերի մեջ եւ Հայաստանի համար շատ բարձր գներով մատուցում է շատ անորակ ծառայություններ: Հայտնի է, որ նման դեպքերում անբավարար աշխատանքը զուգորդվում է չհիմնավորված ծախսերով եւ կոռուպցիայով:
Կարդացեք նաև
Մի խոսքով՝ հասարակական բողոքի տեղ կա: Օգոստոսի 1-ից մենք հոսանքի համար վճարելու ենք 10 տոկոսով ավելի թանկ: Մեր համաքաղաքացիների մեծ մասի գրպանի համար դա բավականին ծանր բեռ է լինելու: Կարծում եմ՝ քաղաքական ուժերի մեծ մասը դրա հետ համաձայն է: Բայց քանի որ հանրահավաքը ՕԵԿ-ն է կազմակերպում, նրանք, մեղմ ասած, այս առումով խանդավառություն չեն դրսեւորում, չեն ղեկավարվում «քաղաքական պրագմատիզմով»:
Գուցե իսկապես այստեղ ինչ-որ ականներ կան: Արի ու գլուխ հանիր այս «քաղաքական հոլովույթներից»:
ԱՐԱՄ ԱԲՐԱՀԱՄՅԱՆ
При Р. Кочаряне Армения процветала? Смешно! Все три президента Армении особенно не отличаются. Ну, Тер-Петросян более образованный. Ну, Кочарян круче по мужски. Хотя кто проверял? Не важно. В итоге имеем то, что имеем. С. Саргсян. Не образован! Не умен! Бесхребетен!
Կարող եք չկասկածել որ Քոչարյանի օրոք երկիրն ծաղկել է,չնայածտեղի ունեցած մի շարք անօրեն դեպքերի Համենայն դեպս այսօրվա վիճակի հետ անհամեմատելի է
Հա, առաջընթաց եղել է, Բագրատյանի ռեֆորմների իներցիայով: Այժմ իրավիճակը ողբալի է հենց Քոչարյանի ստեղծած ու շվեյցարական լավագույն ժամացույցի աստիճանի կատարելագործված քրեաօլիգարխիկ տնտեսությունով, որն ի դեպ նա ստեղծել է Ս. Սարգսյանի ձեռքը բռնած:
Մեկնաբանությունս թեմայի հետ կապ չունի, այդ պատճառով կհասկանամ, եթե մոդերատորները այն չհրապարակեն:
Խոսքս ուզում եմ հղել Առավոտի կայքում պարբերաբար ու համառորեն միայն ռուսերեն, երբեմն նույնիսկ անգլերեն մեկնաբանություններ գրողներին: Հարգելիներս, Առավոտն ունի նաև ռուսալեզու բաժին, եթե ռուսերենն է Ձեզ համար մայրենի լեզուն, ապա այցելե՛ք կայքի ռուսալեզու բաժինը: Ձեր մեկնաբանությունները Ձեր առհամարհանքի ապացույցն են հայերենը գերադասող ընթերցողների նկատմամբ: Ռուսալեզու մեկնաբանություններ ընթերցելու համար կարելի է այցելել ռուսական կայքեր: Ի վերջո ռուսական կայքերում չեք հանդիպի անգլերեն կամ առավել ևս ՛երկրորդ դասի՛ լեզու հանդիսացող հայերեն մեկնաբանությունների: Իհարկե եթե Ձեր նպատակն է քննարկումներին մասնակցելը, այլ ոչ թե քվոտա լրացնելը հասկանալի նկատառումներից ելնելով…
Հ.Գ. Ես անձամբ /միգուցե նաև այլ ընթերցողներ/ երբեք չեմ կարդում այստեղ հրապարակվող օտարալեզու մեկնաբանությունները: Ավելի մատչելի լեզվով ասած մեր ռուսախոս կոնտինգենտի համար՝ дело принципа: Ու եթե այժմ էլ իմ մեկնաբանությանը որևէ մեկը պատասխանի ոչ հայերենով, ես կրկին չեմ կարդալու՝ վերը նշված պատճառներով: I hope it does ring a bell…
Շատ ճիշտ ես Մարիամ ջան, բայց, ցավոք բան չի փոխվի:
Համաձայն եմ, բայց կարող ենք միայն հորդորել ռուսալեզու հեղինակներին տեղափոխվել ռուսերեն էջ: Ստիպել կամ նրանց մեկնաբանությունները չհրապարակել` չենք կարող:
Չենք կարող-ը որքան էլ ցանկանում եմ հասկանալ՝ չեմ կարողանում: Իսկ ոնց եք հասկանում, թե ինչ են գրում օտար լեզվով: Գուգլով թարգմանո՞ւմ եք, թե՞ ոնց: Ոնց թույլ չեք տալիս արաբատառ վրացերեն, այնպես էլ թույլ մի տվեք օտարալեզու որեւէ մեկնաբանություն: Առավոտի այս մոտեցումը, ես, իրոք, ոչ մի կերպ չեմ հասկանում, եւ, պարզապես արհամարհում եմ, չեմ կարդում օտարալեզու մեկնաբանությունները: Ու ամեն մի օտարալեզու մեկնաբանության հետ ավելում է հիասթափությունս:
Միանում եմ Մարիամի կողմից արված դիտողությանը. Հայերենը մոռացաք , Ռուսերենով զարգացաք ?
Եթե ես լինեի հոդվածագրի փոխարեն կգրեի,որ հաջորդ օրը արդեն կվաս կար և կինը շտապում էր ուրախացնել հաճախորդին “кваса есть” հայտարարությամբ:Դա կլիներ ավելի ճիշտ մեր քաղաքական գործիչների գործելաոճը նկարագրելու համար:
Պատմության իմաստը հենց դա է: Այդպես էլ գրել էի: Պարզապես սրբագրիչը, չգիտես ինչու, ուղղել է «սխալը» «ճշտի» վրա եւ պատմության ամբողջ համնուհոտը կորել էր: Շնորհակալություն նկատելու համար: Հիմա «հետ կուղղեմ»:
Շնորհակալություն Ձեզ,որ դեռ կարդում եք իմ մեկնաբանությունները:
Հա, անցած լինի:
Տարիներ առաջ հայրս ցանկանում էր ինչ որ X ապրանք փոխարինել Y-ով: Նրա հետ նույն հիմնարկում աշխատող մեկը ասաց, որ ունի Y և ցանկանում է փոխանակել X-ով: Հայրս չհամաձայնեց, ասելով, Չգիտեմ տվյալ պահին դու ինչում ես ինձ խաբում, բայց անպայման խաբում ես, որովհետև 15 տարի համատեղ աշխատանքը ապացուցել է, որ դու խաբեբա ես:
ՕԵԿ-ը խաբեբայի համբավ ունի և այն փոխելը կարծում եմ անհնար է, համենայնդեպս քանի դեռ այնտեղ են Ա. Բաղդասարյանը և Բիշարյանը:
Հրաշալի անցումներ եք անում, պարոն Աբրահամյան: Ոնց էլ կարողանում եք: Շատ հաճելի է, որ թեկուզ անցյալում, բայց կվաս վաճառող կինը Ձեզ լսել է: Ձեզ շատ շնորհակալ կլինեի, եթե Ձեր թերթն էլ ընդուներ, որ ինքն էլ կարող է квас нет-ի կարգի սխալներ թույլ տալ եւ ուզենար ուղղել դրանք: Եթե ոչ մի ռուս չէր ասի квас нет, ապա հայերս հայերենի սխալների սիրահար ենք: Մի շատ տարածված սխալ՝ «հնարավորություն ունենալ» անելՈՒ ի՞նչ: Հնարավորություն ունենալ օգտվելՈՒ, կարդալՈՒ, գրելՈՒ, բայց ոչ երբեք հնարավորություն ունենալ ՕԳՏՎԵԼ, ԿԱՐԴԱԼ, ԳՐԵԼ: Ականջ ու աչք ծակող նյարդայնացնող սխալ: Եթե կարողանաք հասնել նրան, որ Առավոտի հրապարակումներում չլինեն այս կարգի սխալներ, համարեք, որ կվաս վաճառող կնոջն արված Ձեր դիտողությունն ամբողջովին հասել է իր նպատակին: Շնորհակալություն: