Ադրբեջանի պաշպանության նախարարությունը ուրբաթ օրը պաշտոնական հայտարարություն է տարածել` Հայաստանի նկատմամբ սպառնալիքների հերթական չափաբաժնով:
«Մեր բանակը, որի հրթիռները ուղղված են Հայաստանի վրա, պատրաստ է հրամանի դեպքում հողին հավասարեցնել անգամ մայրաքաղաք Երևանը», – ասված է Ադրբեջանի ռազմական գերատեսչության հայտարարությունում:
Սպառնալիքները հնչել են` իբրև թե Հայաստանի պաշտպանության նախարար Սեյրան Օհանյանի` Մինգեչաուրի ՀԷԿ-ի վերաբերյալ արած հայտարարությանն ի պատասխան: Ադրբեջանի պաշտպանության նախարարությունը պնդում է, իբր Օհանյանը հայտարարել է Մինգեչաուրի ՀԷԿ-ի վրա հնարավոր հարձակման մասին, և սպառնում է, թե հայկական կողմի գործողություններին իրենք ավելի կոշտ կպատասխանեն:
Հիշեցնենք՝ Մինգեչաուրի ջրամբարին երեկ միայն մի հպանցիկ անդրադարձ է եղել Հայաստանի կառավարության նիստի ընթացքում: Երբ արտակարգ իրավիճակների նախարար Արմեն Երիցյանն առաջարկել է քաղպաշտպանության ծառայության չորս հազար հոգանոց խմբով աջակցել սահմանների պաշտպանությանը՝ հիմնավորելով, որ նույն կերպ վարվում է Ադրբեջանը, ահա այս առաջարկին պաշտպանության նախարար Սեյրան Օհանյանը արձագանքել է` բացատրելով, որ Ադրբեջանի արտակարգ իրավիճակների նախարարության քաղպաշտպանության զորքերը վերջին շրջանում հիմնականում պաշտպանում են Մինգեչաուրի ջրամբարը՝ մտավախություն ունենալով, որ հայկական կողմը կարող է այդտեղ գործողություններ իրականացնել։
Կարդացեք նաև
Ահա Հայաստանի պաշտպանության նախարարի այս բացատրությանը Ադրբեջանի պաշտպանության նախարարությունը այսօր նման ռազմատենչ հայտարարությամբ է արձագանքել:
Երևակայական հայտարարություններին արձագանքելուց բացի, Ադրբեջանի իշխանությունները շարունակում են իրական պայքարը իրենց երկրում այլախոհների դեմ և կոշտ ճնշումները քաղաքացիական հասարակության ներկայացուցիչների նկատմամբ:
Տաթեւիկ ԼԱԶԱՐՅԱՆ
Հրապարակումն ամբողջությամբ՝ սկզբնաղբյուր կայքում
