Aravot.am-ը «Օրինավոր որսի ակումբ» հասարակական նախաձեռնության անդամ Էդուարդ Սարիբեկյանից այսօր հետաքրքրվեց` Սեւանա լճի ջրի մակարդակի իջեցմանը զուգընթաց ի՞նչ աստիճանի վրա է գտնվում լճում ձկնորսության վերահսկողությունը, ինչին պրն Սարիբեկյանը պատասխանեց, որ Սեւանա լճում գնալով իրավիճակը վատթարանում է:
«Եթե նախորդ տարիներին կարողանում էին որոշակի քանակությամբ որս կատարել, ապա վերջին տարիներին այդ քանակությունը, պրոգրեսիայով ու մի քանի գործակիցներով պայմանավորված, սկսել է պակասել»,- նշեց նախաձեռնության անդամը:
Պրն Սարիբեկյանի խոսքով` Սեւանի մակարդակի իջեցումը շատ է խանգարում, քանի որ ձվադրման համար նախատեսված առափնյա ծանծաղուտները հիմա նորից ցամաքել են, որն էլ ձկնատեսակների վերացման համար մեծ խթան է հանդիսանում. «Շատ ցավում եմ սիգի համար: Սեզոնին անընդհատ, ամեն տեղ` շուկաներում, փողոցներում, կրպակներում, կարելի է տեսնել սիգի վաճառքը: Ես չեմ հասկանում, որտեղի՞ց է այդ սիգը հայտնվում: Ընդամենը կարելի է չէ՞ մեկ-երկու տարի ստամոքսին տիրություն անել, չառնել էդ սիգը, քանի որ դա նշանակում է ես կերակրում եմ էդ որսագողին»:
Պրն Սարիբեկյանը կոչ է անում չգնել սիգ ձկնատեսակը, քանի որ, եթե որսագողերը տեսնեն ոչ այն քիչ է վաճառվում, ապա այլեւս չեն որսա եւ այն չի վերանա:
Կարդացեք նաև
Մանրամասն` տեսանյութում
«Եթե բոյկոտենք սիգի առքը, ապա կազդենք վաճառքի վրա, վաճառքի վրա ազդելու դեպքում` կազդենք որսագողության վրա: Գոնե մի քանի տարի պետք է թույլ տանք, որ Սեւանը շնչի եւ նորից ունենանք նախկին պատկերը»:
Էլյա ՀՈՎՀԱՆՆԻՍՅԱՆ
