Քիչ առաջ Ավան համայնքի քաղաքից դուրս տանող ճամփեզրից, «Ֆորդ» ավտոսրահի մոտից մեկնարկեց «Դուրս մեր գրպանից» նախաձեռնության կազմակերպած բողոքի մարզային ավտոերթերը: Երեսունից ավելի մեքենաներ, ավտոերթի շրջանակներում կայցելեն Կոտայքի և Գեղարքունիքի մարզերի քաղաքներ և գյուղեր, կկազմակերպվի հանրային քննարկում Սևանի մոտակա հանրային լողափում:
«Հարգելի վարորդներ, «Դուրս մեր գրպանից» նախաձեռնությունը կոչ է անում չվճարել ՃՈ կողմից ձեզ ներկայացված տուգանքները և դրանք բողոքարկել դատարանում: Արդեն բողոքարկված տուգանքների 70-80 տոկոսը չեղյալ են հայտարարվել, և արդարացվել վարորդները». նման բովանդակությամբ թռուցիկներ էին բաժանվում մարզերի բնակիչներին:
Նախախորհրդարանի անդամ, դիրիժոր Վարդան Հակոբյանը Aravot.am-ի հետ զրույցում տեղեկացրեց, որ սա վեցերորդ ավտոերթն է. առաջինը կազմակերպվել է մայիսի 25-ին, այնուհետև շեշտեց, թե տուգանքների զոհերի թիվն աճում է, իրենց շարքերը՝ համալրվում: Պարոն Հակոբյանը վրդովվեց. «Մենք էլ ստիպված ենք երկրի վատ կառավարման հետևանքների հետևից վազվզել:
Կառավարիչները ժողովրդի ծառաներն են, որոնք իրենց պարտականությունները չեն կատարում, նրանց պետք է փոխել»: «Դուրս մեր գրպանից» նախաձեռնության անդամ ռադիոֆիզիկ Արմեն Եփրեմյանը մեզ հետ զրույցում նշեց, որ մեկ տարի առաջ ինքը վճարել է իրեն եկած տուգանքները, սակայն այժմ իրեն ԴԱՀԿ-ից ծանուցում է եկել և իր բոլոր բանկային հաշիվները սառեցվել են: ՃՈ ճանապարհապարեկային ծառայության առաջին սպայական գումարտակի հրամանատարի տեղակալ ոստիկանության փոխգնդապետ Հայկազ Մաթևոսյանը Aravot.am-ի հետ զրույցում ի պատասխան հնչած դժգոհությունների նշեց. «Մի բան է յուրաքանչյուրիցս պահանջվում. երթևեկության մեջ չխախտել ճանապարհային երթևեկության կանոնները: Ինձ չի մտահոգում տեսախցիկների և արագաչափերի առկայությունը այնքանով, որ ես խախտում չեմ կատարում, դա մտահոգում է այն մարդկանց, ովքեր խախտում են անում»:
Կարդացեք նաև
Տաթև ՀԱՐՈՒԹՅՈՒՆՅԱՆ
